Rossiyaning Armanistondagi elchisi Armaniston TIVga chaqirtirildi

Rossiyaning Yerevandagi elchisi Sergey Kopirkin teleboshlovchi Vladimir Solovyovning bayonotlari tufayli Armaniston Tashqi ishlar vazirligiga chaqirildi. Bu haqda Armaniston TIV matbuot kotibi Ani Badalyan ma’lum qildi.

«Unga davlat telekanali dasturida berilgan bayonotlardan chuqur norozilik bildirilgan norozilik notasi topshirildi. Ular Armaniston Respublikasi suverenitetiga nomaqbul tajovuz, dushmanlik ko‘rinishi va Armaniston va Rossiya o‘rtasidagi do‘stona munosabatlarning asosiy tamoyillarini qo‘pol ravishda buzayotgani ta’kidlandi», — dedi Badalyan (NEWS.am iqtibosi).

Rossiya va Armaniston rasman yaqin ittifoqchilar — ikkala davlat ham KXSHT va Bojxona ittifoqiga a’zo. Ammo Rossiya Ozarbayjon bilan ziddiyat fonida ittifoqchisini qo‘llab-quvvatlashdan bosh tortgach, Yerevan AQSh va YEI bilan hamkorlikka tobora ko‘proq intilmoqda. Rossiya telekanallari efirlarida muntazam ravishda Nikol Pashinyan hukumatining xatti-harakatlari tanqid qilinadi.

Solovyov 10 yanvar kuni efirlaridan birida Rossiya, xuddi AQSh Venesuelada qilgani kabi, «xalqaro huquqqa tupurishi» hamda Armaniston va Markaziy Osiyo respublikalarining Rossiya «ta’sir zonasidan» chiqib ketishiga yo‘l qo‘ymaslik uchun ularning ichki ishlariga kuch bilan aralashish imkoniyatini ko‘rib chiqishi kerak, degan fikrni bildirgandi. U buni «milliy xavfsizlikni ta’minlash masalasi» deb atagan.