Rossiya va Amerika delegasiyalari o‘rtasida muzokaralar samarali o‘tdi

Rossiya va Amerika delegasiyalari o‘rtasida muzokaralar Mayamida bo‘lib o‘tdi.

Muzokara guruhlariga AQSh Prezidentining elchisi Stiv Uitkoff va Rossiya Prezidentining elchisi Kirill Dmitriyev boshchilik qildi.

Uitkoff Dmitriyev bilan Rossiya-Ukraina urushini tugatish bo‘yicha muzokaralar samarali bo‘lganini ta’kidladi.

"Bugun Floridada Rossiyaning maxsus elchisi Kirill Dmitriyev Ukraina mojarosini tinch yo‘l bilan hal qilish bo‘yicha AQSh vositachilik sa’y-harakatlari doirasida samarali va konstruktiv uchrashuvlar o‘tkazdi. Ushbu uchrashuv bizga Rossiya Ukrainada tinchlikni ta’minlash uchun ishlayotganiga umid bag‘ishlaydi va biz AQSh Prezidenti Donald Trampga uzoq muddatli va mustahkam tinchlikni topishdagi hal qiluvchi roli uchun minnatdormiz", deb yozdi Uitkoff.

AQSh delegasiyasi tarkibiga Uitkoffdan tashqari, tadbirkor va AQSh Prezidentining kuyovi Jared Kushner, G‘aznachilik kotibi Skott Bessent va AQSh Umumiy xizmatlar ma’muriyatining Federal xarid xizmati komissari va Oq uyning katta maslahatchisi Josh Gruyenbaum kirgan.