BBC ma’lumotiga ko‘ra, muzey signalizasiyasi soat 05:48 da ishga tushgan. Besh daqiqadan keyin shahar polisiyasi voqea joyiga yetib kelgan, ammo o‘g‘rilar bu vaqtga qadar qochib ulgurgan.
Kuzatuv kameralarida niqob taqqan shaxslar kartinalarni ramalaridan kesib olayotgani aks etgan. Ular asarlarni shu tarzda olib chiqib ketgan. O‘g‘irlik qanday amalga oshirilgani hozircha aniq emas.
AFP ma’lumotiga ko‘ra, jinoyatchilar qochish vaqtida kartinalardan birini muzey bog‘ida qoldirib ketgan. Britaniyaning Mirror nashri ushbu asar 1895 yilda yaratilgan «Portrait de Madame Stephen Pichon» kartinasi bo‘lishi mumkinligini xabar qilgan.
O‘g‘irlangan asarlar orasida Renuarning 1905 yilda yaratilgan «Coco Lisant» portreti ham bor. Unda rassomning kichik o‘g‘li Koko tasvirlangan. Bundan tashqari, dastlabki ma’lumotlarga ko‘ra, 1910 yilda yaratilgan «Portrait de Madame Colonna Romano» va 1886 yilda chizilgan «Jeune femme au puits» asarlari ham o‘g‘irlangan.
Renuar muzeyi Nissa shahri yaqinidagi Kan-syur-Mer tepaliklarida joylashgan villada faoliyat yuritadi. Fransuz impressionisti Pyer-Ogyust Renuar ushbu villani XIX asr oxirida qish faslini o‘tkazish uchun qurdirgan. 1960 yildan buyon villa muzey sifatida xizmat qilmoqda.
Kan-syur-Mer meri Brayan Masson hodisaga munosabat bildirib, muzeyga qilingan hujum shaharning tarixi va madaniy merosiga qilingan hujum ekanini ta’kidladi.
Hozirda prokuratura o‘g‘irlik bo‘yicha tergov boshlagan. Huquqni muhofaza qiluvchi organlar muzeydagi kuzatuv kameralari tasvirlarini o‘rganib, jinoyatchilarni aniqlash va o‘g‘irlangan asarlarni topishga harakat qilmoqda.
O‘g‘irlangan kartinalarni ochiq san’at bozorida sotish juda qiyin. Chunki ularning kelib chiqishi ma’lum va o‘g‘irlangani haqidagi ma’lumotlar auksion uylari, muzeylar va san’at bozori ishtirokchilariga yetkazilishi mumkin.
Shu sababli jinoyatchilarning asosiy maqsadi hozircha noma’lum bo‘lib qolmoqda. Tergovchilar asarlar yashirin kolleksiyaga tushib qolishi yoki ularni vositachilar orqali sotishga urinish ehtimolini ham ko‘rib chiqmoqda.
O‘g‘irlangan kartinalarning aniq bozor qiymati hozircha belgilanmagan. Biroq ular Renuarning ijodi va Kan-syur-Mer tarixi bilan bevosita bog‘liq bo‘lgani uchun madaniy va tarixiy nuqtai nazardan bebaho hisoblanadi.
Muzey xodimlari va shahar ma’muriyati uchun hozirgi asosiy vazifa — o‘g‘irlangan asarlarni imkon qadar tezroq topish va ularni muzeyga qaytarish. Polisiya qidiruv ishlarini davom ettirmoqda.
Rossiyada bir hafta ichida kasallanganlar soni qariyb 1 millionga yetdi
10 yildan beri qidiruvda bo‘lgan o‘zbekistonlik ISHIDchi, «Choyxona» rahbari AQShga ekstradisiya qilindi
Netanyaxu nutqi paytida zalni tark etgan davlatlar ro‘yxati
