Qoraqalpog‘iston hududida joriy etilgan favqulodda holatning amal qilishi 21 iyul kuni soat 05:00 dan boshlab muddatidan avval tugatiladi.
Qoraqalpog‘iston Respublikasi hududida favqulodda holatning amal qilishi muddatidan avval tugatiladi. Tegishli farmonni O‘zbekiston prezidenti Shavkat Mirziyoyev imzoladi.
"O‘zbekiston Respublikasi Prezidentining 2022 yil 2 iyuldagi “Qoraqalpog‘iston Respublikasi hududida favqulodda holat joriy etish to‘g‘risida”gi PF‒164-son Farmoni bilan Qoraqalpog‘iston Respublikasi hududida joriy etilgan favqulodda holatning amal qilishi 2022 yil 21 iyul kuni soat 05:00 dan boshlab muddatidan avval tugatilsin", - deyilgan hujjatda.
Farmon 21 iyul kuni soat 05:00 dan e’tiboran kuchga kiradi.
13 iyul kuni Qoraqalpog‘istondagi vaziyat barqarorlashgani sabab komendantlik soatining amal qilish vaqti qisqartirilgandi.
Eslatib o‘tamiz, avvalroq Qoraqalpog‘iston deputatlari 3 iyuldan 3 avgustgacha joriy etilgan favqulodda holatni bekor qilish yuzasidan Shavkat Mirziyoyevga murojaat yo‘llashgani xabar qilingan edi.
