Pashinyan Yevroosiyo iqtisodiy ittifoqi tanazzuli boshlanishini bashorat qildi

Armaniston bosh vaziri Rossiya tomonidan joriy etilgan eksport cheklovlari ittifoq samarasiz ishlayotganini ko‘rsatayotgani va bu uning parchalanishining boshlanishi bo‘lishi mumkinligini bildirdi.

Armaniston bosh vaziri Nikol Pashinyan armaniyalik mahsulotlar eksportiga qo‘yilgan cheklovlar **Evroosiyo iqtisodiy ittifoqi (EOII)**da jiddiy inqiroz mavjudligini ko‘rsatayotganini aytdi. Uning ta’kidlashicha, bu muammo nafaqat Armanistonga, balki butun ittifoqqa taalluqli.

«Muammo Armanistonda emas, balki YEOIIda. Ma’lum bo‘lishicha, Yevroosiyo iqtisodiy ittifoqi falaj holatga kelgan va ishlamayapti. Agar bu masala tez orada hal etilmasa, menimcha, bu YEOII tanazzulining boshlanishi bo‘ladi», — dedi Pashinyan.

Armaniston hukumati rahbari mamlakatning Evropa Ittifoqi va YEOII o‘rtasida tanlov qilish bo‘yicha ehtimoliy referendumi haqida ham fikr bildirdi. Uning so‘zlariga ko‘ra, avval Armaniston Yevropa Ittifoqiga a’zo bo‘lish uchun rasmiy ariza topshirishi lozim.

Pashinyanning ma’lum qilishicha, u bu masalani Rossiya prezidenti Vladimir Putin bilan telefon orqali muhokama qilgan. Uning aytishicha, bir qator masalalar bo‘yicha tomonlar o‘zaro tushunishga erishgan.

«Eng muhimi, Armaniston Respublikasi o‘zi uchun muqobil yo‘llarni tanlashga qonuniy huquqqa ega. Men Rossiya prezidentiga bu yo‘lni tanlaganimizni va ayniqsa, Armaniston xalqi ham uni qo‘llab-quvvatlagani uchun shu yo‘ldan borishda davom etishimizni aytdim», — dedi bosh vazir.

Avvalroq Kreml Vladimir Putin Armanistonda Yevropa Ittifoqiga qo‘shilish masalasi bo‘yicha referendumni imkon qadar tezroq o‘tkazishga chaqirganini ma’lum qilgan edi. Rossiya prezidenti, shuningdek, YEOII va Yevropa Ittifoqining bojxona ittifoqlarida bir vaqtning o‘zida ishtirok etish mumkin emasligini, bu iqtisodiy xususiyatga ega masala ekanini ta’kidlagan.

Kelishmovchiliklar fonida may oyi oxirida Rosselxoznadzor Armanistondan Rossiyaga gullar olib kirishni taqiqladi. Keyinchalik pomidor, bodring, ko‘katlar, qulupnay, meva-sabzavotlar, quritilgan mevalar va sut mahsulotlari importiga ham cheklovlar joriy etildi.

Iyun oyida Evropa komissiyasi savdo cheklovlari oqibatlarini yumshatish uchun Armanistonga 34 million yevro ajratdi va armaniyalik eksportning 80 foizi uchun bojlarni pasaytirishga qaror qildi.

Iyul oyi boshida Yevropa komissiyasi raisi Ursula fon der Lyayen Yevropa Armaniston uchun savdo imtiyozlarini yanada kengaytirish va mamlakat eksportning qariyb 80 foizini bojsiz qilishni rejalashtirayotganini ma’lum qildi. Shuningdek, Armaniston savdoni mustahkamlash va diversifikasiya qilish uchun qo‘shimcha 18 million yevro oladi.