Namozni qanday o‘qiysiz?

Bismillahir Rohmanir Rohiym.
Alloh taologa bitmas-tuganmas hamdu sanolar bo‘lsin.
Payg‘ambarimizga mukammal va batamom salavotu durudlar bo‘lsin.

Isom ibn Yusuf bir kuni Hotam al-Asomning majlisiga kirib, “Ey Hotam, namozni yaxshi ado qilasizmi?” deb so‘radi. “Ha”, dedi Hotam. “”Namozni qanday o‘qiysiz?” so‘radi u yana. Hotam al-Asom shunday dedi: “O‘rnimdan turaman, qo‘rquv bilan namozga yurib boraman, niyat bilan kirishaman, ulug‘vorlik bilan takbir aytaman, tartil va tafakkur bilan qiroat qilaman, xushu’ bilan ruku’ga boraman, tavoze bilan sajda qilaman, tugatish uchun tashahhudga o‘tiraman, niyat bilan salom beraman, Alloh azza va jalla uchun ixlos bilan tugataman, yana xavf bilan namozdan qaytaman, chunki Alloh mendan buni qabul qilmay qolishidan qo‘rqaman va o‘lgunimcha bor kuchim bilan namozimni muhofaza qilaman”.

Isom ibn Yusuf: “Namozni juda yaxshi ado qilar ekansiz”, dedi.