Rossiya tashqi ishlar vaziri Sergey Lavrovning aytishicha, AQSh davlat kotibi Marko Rubioning Ukrainaga doir bayonotlari Vashington va Yevropa Ittifoqi pozisiyalari o‘rtasida deyarli farq qolmaganini ko‘rsatmoqda.
Sankt-Peterburg xalqaro iqtisodiy forumi (SPIEF) doirasida RT Arabic telekanaliga bergan intervyusida Lavrov Rubio bilan yaqinda Ukrainadagi vaziyatni muhokama qilganini aytdi.
«Marko Rubioning Ukrainaga ko‘rsatilayotgan qo‘llab-quvvatlash haqidagi so‘zlarini hisobga olsak, AQSh va Yevropaning yondashuvlari o‘rtasida endi farq yo‘q», — dedi Lavrov.
Rossiya tashqi ishlar vazirining fikricha, mazkur bayonotlar avval «Bayden urushi» deb atalgan mojaro endi «Tramp urushi»ga aylanganini anglatadi.
Lavrov shuningdek, AQSh Mudofaa vazirligi Ukrainaga yordam dasturlarini 2029 yilgacha tasdiqlaganini ta’kidladi. Uning so‘zlariga ko‘ra, Jo Bayden ma’muriyati davrida joriy etilgan bir qator sanksiyalar ham uzaytirilmoqda.
Marko Rubio 3 iyun kuni AQSh Vakolatchilar palatasining Tashqi ishlar qo‘mitasidagi eshituvlar chog‘ida Vashington Ukrainaga harbiy va moliyaviy yordam ko‘rsatib kelayotgani sababli tinchlik muzokaralarida xolis vositachi sifatida qabul qilinishi qiyinligini aytgan edi.
Lavrovning bayonoti Rossiya rasmiylarining AQShning Ukrainaga nisbatan siyosatida prezidentlar almashganiga qaramay, strategik yo‘nalish o‘zgarmagani haqidagi qarashlarini aks ettiradi. Shu bilan birga, Vashington rasmiylari Ukrainaga yordamni mamlakatning mudofaa qobiliyatini ta’minlash va xavfsizlikni mustahkamlash bilan izohlab kelmoqda.
O‘zbekistonda yangi ko‘l paydo bo‘ldi
Qirg‘izistonga yuborilgan 21 tonna tarvuz nega ortga qaytarildi?
Rustam G‘oipovga “Xalq artisti” unvonining berilishi shaxsan davlat rahbarining tashabbusi bo‘lgan
