Isroil hujumi natijasida HAMAS yetakchisining o‘g‘li halok bo‘ldi

​Mamlakat harbiy-havo kuchlarining G‘azo sektoriga bergan zarbasi natijasida HAMASning yuqori lavozimli vakili va Donald Tramp ma’muriyati vositachiligida o‘tayotgan muzokaralarda guruh nomidan ishtirok etayotgan bosh muzokarachi Xalil al-Xayyaning o‘g‘li Azzam al-Xayya halok bo‘ldi.

Bu haqda HAMAS vakili Basim Naim ma’lum qildi. Azzam al-Xayya chorshanba oqshomidagi hujumdan so‘ng olgan jarohatlari tufayli payshanba kuni vafot etgan va u Xalil al-Xayyaning Isroil hujumlari natijasida halok bo‘lgan to‘rtinchi o‘g‘liga aylandi.

​Ushbu voqea Qohirada Isroil bilan o‘t ochishni to‘xtatish rejimini saqlab qolish bo‘yicha muzokaralar davom etayotgan bir paytda yuz berdi. Xalil al-Xayya Al Jazeera telekanaliga bergan intervyusida Isroilni AQSh Prezidentining "Tinchlik kengashi" tomonidan ilgari surilayotgan G‘azo bo‘yicha rejasini izdan chiqarishga urinishda aybladi. Uning so‘zlariga ko‘ra, bunday hujumlar Isroilning sulh kelishuviga amal qilishni istamayotganidan dalolat beradi.

​Shu bilan birga, G‘azo sog‘liqni saqlash vazirligi sektorning g‘arbiy qismidagi polisiya postiga berilgan zarba natijasida kamida uch nafar polisiyachi halok bo‘lganini xabar qildi. Isroil tomoni hozircha mazkur holatlar bo‘yicha rasmiy bayonot bergani yo‘q.

HAMAS vakili Hazem Qosimning ta’kidlashicha, yetakchilar va ularning farzandlarini ta’qib qilish siyosati guruhni siyosiy yon berishga majbur qila olmaydi.