Germaniyada sigaret narxi qariyb 12 yevrogacha qimmatlashadi

Germaniyada tamaki solig‘ini oshirish ma’qullandi. Yangi soliq stavkalari 2027 yildan boshlab amal qiladi. Hozirda o‘rtacha 8,05 yevro turadigan bir quti sigaret narxi 2030 yilga kelib 11,78 yevrogacha oshishi kutilmoqda. Bu haqda DW nashri xabar berdi.

Soliq miqdori to‘rt yil davomida bosqichma-bosqich oshiriladi. O‘zgarishlar nafaqat oddiy sigaretlarga, balki qo‘lda o‘rash uchun mo‘ljallangan tamaki, sigaralar, chilim va boshqa turdagi tamaki mahsulotlariga ham taalluqli bo‘ladi. Shuningdek, elektron sigaretalar uchun suyuqliklar va tamaki mahsulotlari o‘rnini bosuvchi vositalarga solinadigan soliqlar ham oshiriladi. Biroq chakana savdodagi yakuniy narxlar ishlab chiqaruvchilar va sotuvchilarning qarorlariga bog‘liq bo‘ladi.

Germaniya moliya vaziri va vise-kansleri Lars Klingbayl soliqning oshirilishi davlat byudjetiga qo‘shimcha milliardlab yevro daromad keltirishiga umid qilmoqda.

So‘nggi hisob-kitoblarga ko‘ra, 2027-2030 yillarda tamaki solig‘idan tushadigan qo‘shimcha daromad jami qariyb 11,7 milliard yevroni (taxminan 5,96 trillion tenge) tashkil etishi mumkin. Hukumat bu o‘zgarishlarni byudjetni mustahkamlash va, ayniqsa, yoshlar o‘rtasida tamaki iste’molini kamaytirish zarurati bilan izohlaydi.

2025 yilgi tanlanma mikroro‘yxatga olish ma’lumotlariga ko‘ra, Germaniyaning 15 yosh va undan katta aholisining taxminan 19 foizi chekadi. Tamaki jamoat salomatligi uchun jiddiy muammo bo‘lib qolmoqda. Shuni takidlash kerakki, Germaniyaning Saraton kasalligini o‘rganish markazi ma’lumotlariga ko‘ra, 2023 yilda mamlakatda tamaki iste’moli bilan bog‘liq kasalliklar taxminan 131 ming kishining o‘limiga sabab bo‘lgan.