Germaniyada dunyodagi eng baland shamol turbinasi qurildi

Germaniyaning Shipkau shahri yaqinida dunyodagi eng baland shamol turbinasi qurilishi yakunlandi.

Parraklari bilan birga uning balandligi qariyb 365 metrga yetadi. Bu Germaniyadagi Berlin teleminorasidan keyingi balandligi bo‘yicha ikkinchi inshootdir.

Germaniyaning GICON muhandislik kompaniyasi tomonidan Federal ilg‘or innovasiyalar agentligi (SPRIND) uchun ishlab chiqilgan ushbu pilot qurilma balandlikni sezilarli oshirish mavjud shamol infratuzilmasi hajmini ko‘paytirmagan holda ko‘proq elektr energiyasi olish imkonini berishini sinovdan o‘tkazadi.

GICON konsepsiyasining asosiy g‘oyasi — turbinalarni shamol kuchliroq va barqarorroq esadigan balandlikka joylashtirish. Odatda balandlik oshgani sari shamol tezligi ham ortadi, yuqori qatlamlarda esa sharoit barqarorroq bo‘lishi mumkin.

Pilot qurilmaning nominal quvvati 3,8 MVt, kelajakdagi versiyalarida esa bu ko‘rsatkich 7 MVt dan oshishi kutilmoqda. Elektr ishlab chiqarishning ikki baravar oshishi prognozi maksimal quvvatga emas, ma’lum vaqt davomida ishlab chiqariladigan energiya hajmiga taalluqli.

Bunday balandlikka erishish uchun GICON o‘rnatish usulini o‘zgartirdi. Oddiy kran o‘rniga teleskopik minora konstruksiyasi qo‘llanildi.

Maxsus ko‘tarish mexanizmi ichki minorani uni o‘rab turgan panjarasimon konstruksiya orqali yuqoriga ko‘tardi va belgilangan balandlikda mahkamladi.

GICON asoschisi va bosh direktori Yochen Grossmann bu natijani dastlabki konsepsiyadan to‘liq hajmdagi pilot loyihagacha yetib kelgan loyiha uchun muhim bosqich deb atadi.

Eng qiziqarli imkoniyatlardan biri — baland turbinalarni yangi hududlarda shamol elektr stansiyalari qurish o‘rniga, mavjud shamol parklariga joylashtirish.

GICON va SPRIND bunday tizimlarni shamol energiyasining ikkinchi qatlami sifatida ko‘rmoqda: balandroq turbinalar mavjud turbinalarning ustida joylashadi, amaldagi qurilmalar esa pastroq balandlikda elektr ishlab chiqarishda davom etadi.

Hozirgi hisob-kitoblarga ko‘ra, Germaniyada faoliyat yuritayotgan shamol parklarida 4 mingtagacha baland turbina joylashtirish imkoniyati mavjud.

Konsepsiya muvaffaqiyatli bo‘lsa, yangi hududlarni o‘zlashtirmasdan elektr ishlab chiqarishni oshirish va mavjud elektr tarmoqlaridan samaraliroq foydalanish mumkin.

Qolgan qurilish ishlari yakunlangach, qurilmani 2026 yil noyabrida foydalanishga topshirish rejalashtirilgan.