Germaniya va yana beshta davlat Yevropa Ittifoqiga ultimatum qo‘ydi

Germaniya va Yevropa Ittifoqining yana beshta davlati Bryusseldan 2028-2034 yillarga mo‘ljallangan Yevropa Ittifoqi byudjeti xarajatlarini yuzlab milliard yevroga qisqartirishni talab qilishdi.

Financial Times nashri xabar berishicha, Germaniya, Avstriya, Daniya, Niderlandiya, Finlyandiya va Shvesiya rahbarlari tegishli xatni imzoladilar.

"Evropa Ittifoqi byudjeti tub islohotga muhtoj. Biz tanlov qilishimiz kerak", deyiladi xatda.

Germaniya kansleri Fridrix Mers va uning beshta davlatdan kelgan hamkasblari xarajatlarni yuzlab milliard yevroga qisqartirish ta’minlanmaguncha, keyingi yetti yillik Yevropa Ittifoqi byudjetiga rozi bo‘lmasliklarini ma’lum qilishdi.

Financial Times ma’lumotlariga ko‘ra, ushbu ultimatum Yevropa Ittifoqi mamlakatlari o‘rtasida mudofaa uchun mablag‘ ajratish va Xitoy va Qo‘shma Shtatlar raqobati sharoitida qiynalayotgan sanoat tarmoqlarini qo‘llab-quvvatlash choralari kabi yangi xarajatlar ustuvorliklari bo‘yicha kelishmovchiliklarni ta’kidlaydi. Shu bilan birga, an’anaviy ravishda byudjet mablag‘larining katta qismini oladigan fermerlar va kam rivojlangan mintaqalarni qo‘llab-quvvatlashda davom etish zarurati saqlanib qolmoqda.

Oltita yetakchi resurslarni mudofaa va innovasion kompaniyalarni qo‘llab-quvvatlashga yo‘naltirishni istaydi, bu esa o‘sib borayotgan iqtisodiy qiyinchiliklar va xavfsizlik tahdidlariga javob berish uchun zarurdir.

2028-2034 yillarga mo‘ljallangan Yevropa Ittifoqi byudjetini tasdiqlash uchun barcha 27 a’zo davlatning bir ovozdan roziligi talab etiladi. Oltita davlatning kelisha olmaslik tahdidi Yevropa Ittifoqi rahbarlarining iyun oyidagi sammitda shu yil oxirigacha kelishuvga erishish bo‘yicha bergan va’dasiga ziddir. Financial Times ta’kidlaganidek, Fransiya, Italiya, Ispaniya va Polshada bo‘lib o‘tadigan saylovlar kelgusi muzokaralarni murakkablashtirishi mumkin.