Falastin tarafdori bo‘lgan nomzod Berlin saylovida g‘alaba qozondi

«So‘llar» partiyasi Elif Eralp boshchiligida Berlin saylovida g‘alaba qozonib, 25,7 foiz ovoz oldi. Bu partiya uch yil avvalgi natijasini ikki baravardan ko‘proq yaxshiladi. Endi Eralp shahar hokimi lavozimiga da’vo qilmoqda, biroq uning partiyasi hukumat tuzishi uchun kamida yana ikki siyosiy kuch bilan koalisiya tuzishi kerak bo‘ladi.

«Berlinliklar, rahmat — ishonchingiz uchun rahmat. Bugun biz birgalikda tarix yaratdik. Shu lahzadan boshlab Berlinni birgalikda o‘zgartiramiz», — dedi Eralp natijalar e’lon qilinganidan so‘ng tarafdorlari oldida. Uning so‘zlariga ko‘ra, «muhabbat va adolat» «nafrat» ustidan g‘alaba qozongan.

Elif Eralp 1981 yilda Myunxenda 1980 yilgi harbiy to‘ntarishdan keyin Germaniyaga ko‘chib kelgan turkiyalik muhojirlar oilasida tug‘ilgan. U Dortmund va Gamburgda ulg‘aygan, so‘nggi 16 yildan beri Berlinda yashaydi. Eralp 2017 yilda «So‘llar» partiyasiga qo‘shilgan, 2021 yilda esa Berlin federal yeri parlamenti deputati bo‘lgan. Ungacha partiya parlament fraksiyasida huquqiy siyosat bo‘yicha maslahatchi bo‘lib ishlagan va inson huquqlari hamda kamsitish masalalari bilan shug‘ullangan.

Uning saylovoldi kampaniyasida asosiy mavzular yashash xarajatlarining oshishi, ijara haqining yuqoriligi va shahar xizmatlarining qulayligi bo‘ldi. Eralp shaharga tegishli uylarda ijara haqini cheklash, ijara narxlarining noqonuniy oshirilishiga qarshi kurashadigan maxsus idora tashkil etish va yirik uy-joy kompaniyalarini davlat tasarrufiga qaytarish rejalarini qayta tiklash tarafdori.

Uning kampaniyasida G‘azodagi vaziyat va Berlindagi Falastin tarafdori bo‘lgan namoyishlarga munosabat ham alohida o‘rin tutdi. Eralp Xristian-demokratik ittifoq (XDS) boshchiligidagi hukumat koalisiyasini tadbirlarni bekor qilgani va, uning fikricha, tinch namoyishchilarga nisbatan polisiya kuchini haddan tashqari qo‘llagani uchun tanqid qildi.

«Berlin meri hech qachon Berlindagi falastinliklarning muammolariga quloq tutmagan va bu katta xato», — degan edi Eralp. Shuningdek, u Isroil hukumatini tanqid qilishni antisemitizm bilan tenglashtirishga qarshi chiqqan.

Avvalroq Eralp Germaniya hukumati musulmonlar, falastinliklar, shuningdek, ko‘plab yahudiylarning qarashlariga yetarlicha e’tibor qaratmaganini aytgan. «Mening vazifam — bu barcha qarashlarni tan olish va ularni birlashtirish», — degan u.

Eralp Germaniyada musulmonlar va falastinliklarga nisbatan biryoqlama munosabat va aybdorlik prezumpsiyasi mavjudligidan ham ogohlantirgan. Shu bilan birga, u antisemitizmning har qanday shakliga qarshi ekanini va uni Isroil hukumatini tanqid qilishdan aniq ajratish zarurligini ta’kidlagan.

Endi Eralpni koalisiya muzokaralari kutmoqda. «So‘llar» mutlaq ko‘pchilikka ega bo‘lmagani uchun hukumat tuzish maqsadida hamkorlar izlaydi. Ushbu muzokaralar natijasi Eralp Berlin hokimi lavozimini egallay oladimi va partiyasi saylovda g‘alaba qozonishiga olib kelgan dasturini amalga oshira oladimi, shuni belgilaydi.