Evropa hayratda: Tramp Rossiyaga qarshi sanksiyalardan voz kechdi

Bild AQSh prezidenti va Yevropa yetakchilari o‘rtasidagi telefon suhbatining yangi tafsilotlarini bilib oldi.

Donald Tramp va YEI yetakchilari o‘rtasidagi yopiq telefon suhbati chog‘ida Vladimir Putin bilan bo‘lib o‘tgan suhbatdan so‘ng, AQSh prezidenti kutilmaganda Ukrainadagi urushga nisbatan siyosati keskin o‘zgarganini ma’lum qildi.

Bild'ning Germaniya hukumatidagi manbalaridan ma’lum qilishicha, Tramp endi Moskvadan 30 kunlik o‘t ochishni to‘xtatishni talab qilmayapti va yangi sanksiyalar joriy etish niyatida emas, garchi u avvalroq Yevropadagi ittifoqchilariga bu haqda va’da bergan bo‘lsa ham.

Germaniya kansleri Fridrix Merts, Fransiya prezidenti Emmanuyel Makron, Yevropa komissiyasi raisi Ursula fon der Lyayen va suhbatning boshqa ishtirokchilari Trampning bayonotidan hayratda qolishdi. U, xususan, “Rossiya va Ukraina endi o‘zaro yechim izlaydi”, dedi.

Bild manbalaridan birining ta’kidlashicha, o‘sha paytda "hamma nafasini ushlab turdi" - bu AQShning Ukrainani qo‘llab-quvvatlashdan butunlay voz kechayotganini anglatadimi yoki yo‘qligini aniqlashga hech kim hatto jur’at eta olmadi.

Bild manbalariga ko‘ra, Merz Tramp bayonotining ta’sirini yumshatishga uringan va ehtimoliy tinchlik muzokaralariga tayyorgarlik ko‘rish uchun tomonlar vakillarining texnik uchrashuvini o‘tkazishni taklif qilgan. Tramp bunga rozi bo‘ldi, bu esa AQSh va Yevropa o‘rtasidagi muvofiqlashtirishning darhol buzilishining oldini oldi.

Biroq Berlin Tramp istalgan vaqtda o‘z pozisiyasini qayta ko‘rib chiqishi mumkinligidan xavotirda. Vashingtonning mojarodagi ishtirokidan butunlay voz kechishi va Amerikaning Rossiyaga qarshi sanksiyalarini bekor qilishi, tahlilchilar fikricha, Ukrainaga jiddiy zarba berishi mumkin.