Bugundan boshlab Buyuk Britaniyaga kirish pullik bo‘ladi

Bugundan boshlab, 85 ta mamlakatdan kelgan mehmonlar Buyuk Britaniyaga kirishdan oldin elektron sayohat ruxsatnomasini (ETA) olishlari kerak, aks holda ularga kirish rad etiladi.

Bu haqda Buyuk Britaniya Ichki ishlar vazirligi e’lon qildi.

Elektron sayohat ruxsatnomasi (ETA) tizimiga ko‘ra, Buyuk Britaniyaga kirish uchun viza talab qilinmaydigan barcha mehmonlar oldindan kirish ruxsatnomasini onlayn ravishda 16 funt sterlingga (21,57 AQSh dollari) sotib olishlari kerak.

Ushbu chora 2023 yilda joriy etilgan va o‘tgan yilning aprel oyida yevropalik sayyohlarga nisbatan qo‘llanilgan, ammo unga rioya qilish ixtiyoriy edi.

Biroq, 25 fevraldan boshlab Buyuk Britaniyaga tashrif buyuruvchilar uchun elektron sayohat ruxsatnomasi (ETA) majburiy bo‘lib qoladi.

Bu shuni anglatadiki, "aviakompaniyalar elektron sayohat ruxsatnomasi (ETA), elektron vizasi yoki boshqa amaldagi sayohat hujjatlariga ega bo‘lmagan yo‘lovchilarni samolyotga qo‘yishdan bosh tortadilar", deb ta’kidladi Ichki ishlar vazirligi.

Shu bilan birga, Buyuk Britaniya va Irlandiya fuqarolari, shu jumladan ikki fuqaroligi bo‘lganlar, shuningdek, Buyuk Britaniyada yashash huquqiga ega bo‘lganlar elektron sayohat ruxsatnomasini (ETA) olish talabidan ozod qilingan. O‘z navbatida, Buyuk Britaniya migrasiya vaziri Mayk Tapp yangi majburiy qoida haqida shunday dedi: "ETA dasturi Buyuk Britaniya chegara xavfsizligini mustahkamlash bo‘yicha ishimizning muhim qismi bo‘lib, tashrif buyuruvchilar va Britaniya jamoatchiligi uchun qulay bo‘lgan yanada samarali va zamonaviy xizmatni taqdim etishga yordam beradi".