Surxondaryo viloyati Boysun tumanida 9 oktyabr kuni yo‘l transport hodisasi oqibatida haydovchi halok bo‘ldi. Bu haqda viloyat Yo‘l harakati xavfsizligi boshqarmasi xabar berdi.
Ma’lum bo‘lishicha, haydovchi tezlik yuqori bo‘lgani sabab boshqaruvni yo‘qotgan va mashina yo‘l chetiga chiqib, chuqurlikka ag‘darilib ketgan. Oqibatda u halok bo‘lgan, bir nafar yo‘lovchi esa og‘ir tan jarohati olgan.
Qayd etilishicha, voqea joyi o‘rganilganda yotiq chiziqlar chizilgani, yo‘l belgilari o‘rnatilgani va yo‘lni ikki tomonga ajratuvchi to‘siqlar mavjudligi aniqlangan. YTHga haydovchining yetarli tajribaga ega bo‘lmagani va tezlikni me’yordan oshirib harakatlangani sabab bo‘lgan.