AQSh G‘azodagi insonparvarlik missiyasini yopadi

​Bu haqda Reuters agentligiga diplomatik manbalar xabar bergan.

Tramp ma’muriyati G‘azo yaqinida joylashgan Fuqarolik-harbiy muvofiqlashtirish markazini yopishga qaror qildi. Ushbu markaz Isroil va HAMAS o‘rtasidagi sulhni kuzatish hamda insonparvarlik yordamini muvofiqlashtirish uchun mas’ul edi, biroq tanqidchilar uni o‘z vazifasini uddalay olmaganlikda ayblayapti.

​Markazning vazifalari yaqin orada G‘azoda joylashtirilishi rejalashtirilgan Xalqaro barqarorlashtirish guruhiga (ISF) o‘tkaziladi. Bu o‘zgarish doirasida hududdagi AQSh harbiylari soni 190 nafardan 40 nafargacha qisqartiriladi va ularning o‘rni boshqa davlatlardan kelgan fuqarolik xodimlari bilan to‘ldiriladi. Garchi Oq uy markazning yopilishi haqidagi xabarlarni rad etayotgan bo‘lsa-da, diplomatlar bu qadamni Trampning G‘azo bo‘yicha rejasi inqirozga uchrayotganining belgisi sifatida baholashmoqda.