Apple kompaniyasining yangi iPhone 17 seriyasi jahon bozoriga chiqishga tayyor

Bu jarayonda Xitoyning ishlab chiqarish ekotizimi yana bir bor asosiy rol o‘ynamoqda, deb xabar beradi “Sinxua”.

Asosiy markaz – Chjenchjou shahridagi Foxconn zavodi. Bu dunyodagi eng yirik iPhone yig‘ish bazalaridan biri va Xitoyning elektronika ishlab chiqarishdagi miqyosi ramzi.

Zavod hozir to‘liq quvvat bilan ishlayapti va jahon talabini qondirish uchun ishchi kuchini oshirib boryapti. Foxconn kompaniyasining ishga qabul qilish markazi oldida har kuni minglab odamlar uzun navbatda turadi.

"Iyul oyining oxiridan beri biz har kuni minglab nomzodlarni qabul qilamiz. Bu holat sentyabr oxirigacha davom etishi kutilyapti", - deydi Foxconn kompaniyasining kadrlar bo‘limi boshlig‘i o‘rinbosari Fan Simin.

Zavodda ishlab chiqarishning eng yuqori davrlarida o‘n minglab vaqtinchalik ishchilar ishlaydi. Ular yig‘ish, sifat nazorati va qadoqlash bilan shug‘ullanadi.

Xenan provinsiyasida yashovchi Chjao Yanxueyning aytishicha, uch oylik ish unga va uning rafiqasiga 40 ming yuandan (taxminan 5 600 dollar) ko‘proq foyda keltirishi mumkin.

“Bu mintaqadagi o‘rtacha daromaddan ancha yuqori”, - dedi u Sinxua agentligiga bergan intervyusida.

Chjenchjou yirik transport markaziga aylandi. Bu yerda 8 ta xalqaro yuk havo yo‘llari ishlaydi, ular Yevropa, Amerika va Osiyoning 24 mamlakatidagi 100 dan ortiq shaharlarni bog‘laydi. Yangi iPhone jo‘natmalari butun dunyo bo‘ylab havo, temir yo‘l va avtomobil orqali jo‘natiladi.