Afsus! Urgutda 45 yoshli erkak xotiniga OITS yuqtirgan

Mazkur ish jinoyat ishlari bo‘yicha Urgut tuman sudida A.Ahmadov raisligida ko‘rib chiqildi. Bu haqda "Kun" nashri xabar berdi.

Ma’lum bo‘lishicha, tumanning «Vatkan-Qo‘zibek» mahallasida yashovchi fuqaro Z.X.da 2009 yil 30 noyabrda OITS kasalligi tasdiqlangan. Z.X. OIV/OITS kasalligi virusini boshqa shaxslarga yuqtirmaslik to‘g‘risida rasman ogohlantirilgan.

Shunga qaramay, turmush o‘rtog‘iga bu haqda aytmasdan yashab kelgan, kasallik yuqtirishi mumkin bo‘lgan holatning oldini olmagan.

Buning oqibatida turmush o‘rtog‘i SH.S. ham OITS bilan xastalanib, tegishli tartibda ro‘yxatga olingan.

Z.X. sudda aybiga to‘liq iqrorlik bildirgan. Uning turmush o‘rtog‘i haqiqatan ham erining OISTga chalinganini bilmagani, ammo unga nisbatan da’vosi yo‘qligini aytib, suddan turmush o‘rtog‘iga yengillik berishni so‘ragan.

Z.X. muqaddam sudlangan bo‘lib, 2009 yilda jinoyat kodeksining 276-moddasi 1-qismi, 25-, 273-moddasi 5-qismi bilan aybli deb topilib (giyohvand vositalariga doir), 3 yil muddatga ozodlikdan mahrum qilingan.

Jinoyat ishlari bo‘yicha Past Darg‘om tuman sudining 2010 yil 29 iyunda o‘talmay qolgan 2 yil 2 oy 18 kun ozodlikdan mahrum qilish jazosi shu muddatga axloq tuzatish ishlari jazosiga almashtirilgan. 2010 yil 22 oktyabrda esa amnistiya aktiga asosan jazodan ozod qilingan.

Sud Z.X.ga uzil-kesil 3 yil 6 oy ozodlikni cheklash jazosi tayinladi.