Январ ойида Россия Украинага рекорд миқдорда баллистик ракеталар учирди

Украиналик ҳарбий эксперт Александ Коваленконинг маълумотларига кўра, январ ойида Россия жами 91 та баллистик зарба воситасидан фойдаланган. Украина шулардан тахминан учдан бирини йўқ қилишга эришган.

Ойнинг биринчи ҳафтасида Россия томонидан 18 та баллистик ракета учирилган, лекин фақат битта нишон йўқ қилинган. Январнинг иккинчи ҳафтасида 38 та 9М723 ва КN-23 ракеталари, шунингдек, С-300 комплексларининг 5В55 ракеталари ишлатилган. Улардан 11 таси йўқ қилинган.

Учинчи ҳафтада учирилган 23 та баллистик ракетадан 14 таси йўқ қилинган. Ойнинг охирги ҳафтаси ва қолган кунларда учирилган 12 та ракетадан бештаси йўқ қилинган.

Коваленко бу Украина-Россия уруши давридаги энг юқори кўрсаткич эканини, олдинги рекорд 2025 йил октабр ойида 89 та ракета билан қайд этилганини ёзган.

Экспертнинг таъкидлашича, баллистик ракеталар амалда зарбалар беришнинг асосий воситасига айланиб, Х-101 ва 3М14 “Калибр” қанотли ракеталарини орқага суриб қўйган. Россия армияси Украинага зарбалар учун баллистик ракеталарни қанотли ракеталарга нисбатан деярли 2,5 баравар кўпроқ ишлатади ва амалда деярли ҳар куни қўллайди.

Коваленко баллистик ракеталарга қарши чоралар кўриш 2026 йилда Украина ҳаво мудофаа тизими учун асосий чақириқлардан бирига айланиши мумкинлигини, чунки Москва бундай зарбаларни кенгайтиришга урғу бераётганини билдирди.