Яманда АҚШнинг яна бир учувчисиз ҳарбий самолёти уриб туширилди

АҚШнинг MQ-9 ҳарбий самолёти Яманнинг  жанубий-шарқида жойлашган Дҳамар вилоятида уриб туширилган. Ҳозирда ушбу ҳудуд жангари Хусий гуруҳи тасарруфидадир. АҚШнинг икки расмийси Reuters агентлигига бу ҳодиса сўнгги ойлардаги иккинчиси  бўлганини маълум қилган.

Ўзини ошкор қилмаслик шарти билан гапирган расмийларнинг таъкидлашича, самолёт сешанба куни кечқурун ўққа тутилган.

Расмийлардан бирининг сўзларига кўра, Калифорния штатидаги General Atomics томонидан ишлаб чиқарилган ҳарбий самолёт Эрон билан бирлашган Хусий гуруҳи томонидан бошқарилаётган ракета орқали уриб туширилган.

“Биз Эрон Хусий ва шунга ўхшаш жангариларга ёрдам бераётганидан хабардормиз. Бундай ҳаракатлар минтақа хавфсизлигига таҳдид солади”, деди АҚШ ҳарбий қўмондони.  Самолётни йўқотиш қимматга тушган бўлса-да, АҚШ бунга жавоб қайтариши эҳтимолдан йироқ, дейди расмийлардан бири.

Эслатиб ўтамиз, июнь ойида Эрон MQ-9 самолётидан каттароқ бўлган АҚШнинг Global Hawk номли учувчисиз самолётини уриб туширганди. АҚШнинг жавоб зарбалари деярли аниқ эди. Аммо кутилмаганда Трамп ҳужумни бекор қилди, чунки у 150 кишининг ҳаётига нуқта қўйиши мумкин эди.

Ўтган йили Трамп Эронни ядровий қуроллардан воз кечишга кўндиролмагач, янги санкцияларни жорий этган ва Эрон  янги жазо чораларини «иқтисодий уруш», деб атаганди.