Эрон парламенти депутати Валиолла Баятнинг маълум қилишича, Миллий Эрон нефть компанияси (NIOC) Хитойдаги еттита нефтьни қайта ишлаш заводи билан тузилган икки йиллик шартномаларни муддатидан олдин бир томонлама бекор қилган.
Бу ҳақда 7 октябрь куни Эрон Инқилоб қўриқчилари корпусига яқин Tasnim агентлиги хабар берди.
Депутатнинг айтишича, шартномалар тузилганидан атиги олти ой ўтиб бекор қилинган. Хитой компаниялари бу қарор учун компенсация талаб қилиши мумкин. Баят бу ҳолат Эрон учун катта молиявий мажбуриятларга олиб келган аввалги «Crescent» ишига ўхшаш низога айланиши мумкинлигидан огоҳлантирган.
Баят шартномалар бекор қилиниши Эрон ва Хитой ўртасидаги 25 йиллик стратегик ҳамкорликка ҳам салбий таъсир кўрсатганини таъкидлаган. У нефть вазирлигидаги янги раҳбариятни мамлакат учун фойдали деб баҳоланган шартномаларни бекор қилишда айблаган.
Депутатнинг фикрича, мазкур қарор Эрон парламенти спикери Муҳаммад Боқир Қолибофнинг Хитойга режалаштирилган ташрифи билан боғлиқ айрим муаммоларга ҳам сабаб бўлган бўлиши мумкин. Қолибоф Хитой билан муносабатларни мувофиқлаштириш бўйича махсус вакил этиб тайинланган, аммо ҳозиргача Пекинга ташриф буюрмаган.
Парламентнинг миллий хавфсизлик ва ташқи сиёсат қўмитаси аъзоси Аҳмад Бахшаеш Ардестани ҳам шартномалар бекор қилинганини тасдиқлаб, ҳолатни текширишга чақирди. У нефть учун тўлов амалга оширилмагани ёки санкциялар сабабли тўловни амалга ошириш имкони бўлмаганини аниқлаш зарурлигини айтди.
Айни пайтда Эрон парламенти нефть вазирлиги фаолияти бўйича текширув ўтказиш имкониятини кўриб чиқмоқда.
Жиззахда эркак 10 ёшли болани зўрлаб, сўнг ўз жонига қасд қилди
Шахмат терма жамоаси аъзолари ҳибсга олинди
Нега айнан Эркинжон Турдимов? Бу қарор ортида қандай омиллар турибди?
