“Хитой ва Россия Эронга ёрдам бераётганига умуман ишонмайман”

АҚШ президенти Дональд Трамп Хитой ва Россия Эронга кўмаклашаётганига умуман ишонмаслигини айтди. Унинг таъкидлашича, Москва ва Пекин Теҳронни қўллаб-қувватласа, жуда кўп нарсани йўқотади. Бу ҳақда Reuters хабар берди.

Трамп Truth Social тармоғида Хитой ва Россиянинг Эронга ёрдам бераётгани ҳақидаги фикрларга муносабат билдирди.

“Агар улар ёрдам бераётган бўлса ҳам, бу кўмак жуда паст даражада. Лекин мен бунга умуман ишонмайман. Уларнинг йўқотадиган нарсаси кўп. Агар шундай бўлганида, биз бу ҳақда тезда билиб олардик”, деб ёзди Трамп.

АҚШ президенти июль ойида ҳам Хитой ва Россия Эронга қарши урушда Теҳронга ёрдам бермаслигига ишонишини айтганди. Бироқ улар вазиятга аралашса, бу икки мамлакат учун “жуда ёмон бўлиши”дан огоҳлантирганди.

Трамп илгари Хитой раиси Си Цзиньпин ва Россия президенти Владимир Путинни Эронга қарши урушда нейтрал позицияда деб таърифлаганди.

Москва ва Пекин Теҳрон билан яқин алоқаларни сақлаб келмоқда. Россия Эрондаги уруш Яқин Шарқда ядровий қуролланиш пойгасига олиб келиши мумкинлигини билдирди. Пекин эса Вашингтоннинг Теҳронга ҳужумларини Эрон суверенитетининг қўпол равишда бузилиши деб қоралади.