Хитой етакчисининг ўринбосари мудофаа вазири лавозимини “сотишда” гумон қилинмоқда

Хитой Марказий ҳарбий кенгашида Хитой етакчиси Си Жинпиннинг ўринбосари бўлган Чжан Юся АҚШга ядро қуроли дастури ҳақидаги маълумотларни узатишда айбланмоқда — The Wall Street Journal

Нашрнинг ўз манбаларига таяниб хабар беришича, Чжан Юся мамлакатдаги ядро қуроли яратиш дастури ҳақида АҚШга ахборот узатганликда айбланмоқда. Бундан ташқари, генерал пора олишда ва мудофаа вазири лавозимини “сотишда” гумон қилинмоқда.

Аввалроқ Хитой Мудофаа вазирлиги Чжан Юся ҳамда Марказий ҳарбий кенгаш Бирлашган штаби бошлиғи Лю Чжэнли устидан тергов бошланганини маълум қилган эди. Вазирлик жиноят ишларининг тафсилотларини ошкор қилмаган. Фақатгина ҳар икки юқори мартабали амалдор “интизом ва қонунни жиддий бузишда” гумон қилинаётганини билдирган. Одатда Хитойда бу ибора ортида коррупция айбловлари ётади.

WSJ маълумотларига кўра, икки нафар юқори лавозимли ҳарбий амалдорга нисбатан тергов бошланганини расман эълон қилишдан бир неча соат аввал Хитой армияси олий ҳарбий раҳбарияти иштирокида ёпиқ брифинг ўтказилган.

Хитойдаги энг юқори лавозимли ҳарбий амалдор ҳисобланган Чжаннинг вазифадан четлатилиши ХХР раиси Си Жинпинг қўлида ҳарбий ҳокимиятнинг мисли кўрилмаган даражада жамланишини англатади, дея қайд этади нашр.

Financial Times газетаси ҳам армиядаги коррупцияга қарши терговлар натижасида қуролли кучларга раҳбарлик қилувчи Марказий ҳарбий кенгашда атиги икки киши қолганини, улардан бири Хитой раҳбари эканини таъкидлайди. Журналистлар бу ҳолат МҲК учун мисли кўрилмаган вазият эканини кўрсатади.

2013 йилда ХХР раиси лавозимига киришганидан сўнг, Си Жинпин ҳарбий ва давлат бошқарувининг барча даражалардаги эҳтимолий коррупциясига қарши курашни кучайтирган. Танқидчилар эса у коррупцияга қарши кампанияни кераксиз рақибларни бартараф этиш учун ишлатяпти, деб ҳисоблайди.

Октябр ойида Хитой ҳукумати армиянинг тўққиз нафар вакилига нисбатан коррупция гумони билан терговлар бошланганини эълон қилган. Икки нафар юқори мартабали генерал лавозимидан олинган, улар орасида Чжан Шэнминнинг ўтмишдоши бўлган Хэ Вэйдун ҳам бор.