Хитой Ташқи ишлар вазирлиги америкалик эркакнинг “жосуслик” ва “миллий хавфсизликка таҳдид солиш” моддаси билан ҳибсга олинганини тасдиқлади. Бундан бир кун аввал АҚШ оммавий ахборот воситалари июн ойи бошида ҳам Қўшма Штатлар, ҳам Мянма фуқаролигига эга бўлган олим қўлга олингани ҳақида хабар тарқатган эди.
Хитой ТИВ матбуот котиби Лин Жианнинг маълум қилишича, Мянма Стратегия ва сиёсат институти (ISP-M) асосчиси Мин Зин жиноий жавобгарликка тортилган. Лин Жианнинг қўшимча қилишича, Хитой ҳукумати ҳибс тўғрисида Қўшма Штатларнинг Гуанжоу шаҳридаги бош консуллигини огоҳлантирган.
ISP-M институти 2021 йилги ҳарбий тўнтаришдан кейин фуқаролар урушига тортилган Мянманинг сиёсати, ресурслари ва низолар динамикасини тадқиқ қилади. Ушбу ҳибс ҳақидаги хабар Пекин расмийлари Мянма президенти Мин Аунг Ҳлайннинг 15–19 июн кунлари Хитойга ташриф буюришини эълон қилган кунда тарқалди.
The New York Times нашрининг ёзишича, Мин Зин Мянма сиёсатини ўрганган тадқиқотчидир. У ўсмирлик даврида ҳарбий бошқарувга қарши намойишларда ҳам қатнашган. Хабарга кўра, олим 3 июн куни Мянма билан чегара яқинидаги Юннан провинсиясининг Кунмин шаҳрида ғойиб бўлган. Унинг ISP-M тадқиқот гуруҳи Мянманинг олдинги пойтахти Янгонда жойлашган.
АҚШ Давлат департаменти NYT нашрига ҳибсни тасдиқлаган ва тегишли консуллик ёрдами кўрсатиш устида ишлаётганини билдирган. Бироқ бошқа тафсилотларни очиқламаган.
Тимми исмли кит биоёқилғига айланади
Жалолиддин Машарипов терма жамоа қайдномасидан чиқарилмоқда
АҚШда ҳам тўй қилаётганлар ақлдан озмоқда
