Ўзбекистоннинг олтин-валюта захиралари 66 млрд доллардан ошди

2026 йил 1 январ ҳолатига, Ўзбекистоннинг олтин-валюта захиралари 66,3 млрд долларни ташкил қилди. Захиралар қиймати декабр ойида 5,1 млрд долларга кўпайган. Бу ҳақда Марказий банк тақдим қилган ҳисоботда келтирилган.

Ўтган ой давомида захираларнинг валюта қисми 829 млн долларга ошган бўлса, олтин қисмининг қиймати 4,2 млрд долларга ошиб, 55 млрд долларгача кўпайган. Захиралар таркибида олтиннинг физик ҳажми ҳам 12,2 млн троя унциядан 12,6 млн троя унцияга етган.

Умуман олганда, 2025 йил давомида Ўзбекистоннинг захира активлари 25,1 млрд долларга кўпайди. Катта ўсиш халқаро бозорда олтин нархларининг қимматлашиши фонида юз берди. Жаҳон савдосида ноаниқликлар, АҚШ Федерал резерв тизимининг мустақиллиги атрофидаги хавотирлар ва Қўшма Штатларнинг фискал барқарорлигига доир шубҳалар кучайгани сабаб октябр ойида нархлар 4000 доллардан ошди. Декабр ойига келиб эса қимматбаҳо металл баҳоси 4500 доллардан ҳам кўтарилди. Олтин 2025 йилда 70 фоизга қумматлашди, бу – охирги 46 йил ичидаги энг катта ўсиш.

Бундан ташқари, Марказий банк томонидан харид қилинган қимматли қоғозларнинг қиймати йил давомида 102 млн доллардан 1 млрд 532 млн долларгача кўпайди.