Ўзбекистон "ШҲТ 2040" концепциясини ишлаб чиқишни таклиф қилди

Ўзбекистон Президенти Шавкат Мирзиёев "ШҲТ 2040: Умумий ривожланиш майдони" концептуал қарашларини ишлаб чиқишни таклиф қилди.

Шавкат Мирзиёев бу ҳақда Бишкекда бўлиб ўтган Шанхай Ҳамкорлик Ташкилоти (ШҲТ) Давлат раҳбарлари кенгаши йиғилишида маълум қилди.

Унинг сўзларига кўра, концепциянинг асосий мақсади инвестициялар, технологиялар ва билимлар эркин алмашинадиган, йирик инфратузилма ва саноат лойиҳалари амалга ошириладиган ҳамда минтақалар, бизнес ва аҳоли ўртасидаги тўғридан-тўғри алоқалар кенгайтириладиган ўзаро боғлиқ ва барқарор макон яратиш бўлиши керак.

Мирзиёев шунингдек, махсус иқтисодий зоналар, ишлаб чиқариш жараёнлари, савдо бозорлари ва логистикани бирлаштирадиган ШҲТ Саноат Ҳамкорлиги Харитасини ишлаб чиқишни таклиф қилди.

Бундан ташқари, Ўзбекистон ШҲТ Тараққиёт Банкини амалий ишга тушириш ва транспорт, энергетика, саноат ҳамкорлиги ва рақамли инфратузилма соҳаларида устувор лойиҳалар портфелини шакллантиришни бошлаш зарур деб ҳисоблайди.

Сунъий интеллектни ривожлантириш учун Ўзбекистон ШҲТнинг очиқ кўп тилли маълумотлар корпусини яратишни ва келаси йили Тошкентда ШҲТнинг Сунъий интеллект ва янги рақамли ечимлар бўйича форумини ўтказишни таклиф қилди.

Мирзиёев шунингдек, иқлим муаммоларини ҳал қилиш учун ШҲТ механизмини яратиш, аъзо давлатлар темир йўл ҳудудларини интеграция қилиш бўйича кенгаш тузиш ва ШҲТнинг Афғонистон билан мунтазам мулоқотини қайта бошлашни таклиф қилди.