Уруш бошлангандан бери Украина 43 минг ҳарбийни йўқотди – Зеленский

Президент Владимир Зеленскийнинг айтишича, кенг кўламли уруш бошланганидан бери Украина 43 минг ҳарбийни йўқотган, яна 370 минг киши жароҳатланган.

Шу билан бирга, Зеленский «армияда ярадорларнинг тахминан 50 фоизи хизматга қайтади ва бу ҳам юқоридаги рўйхатда қайд этилади. Яъни ярадорларнинг умумий сонида енгил жароҳатланганлар ва такрор фронтга кирганлар ҳам акс этган».

Зеленскийнинг сўзларига кўра, Россия жами 750 минг ҳарбий хизматчисини йўқотган, жумладан 198 минг нафари ҳалок бўлган ва 550 мингдан ортиғи яраланган.

Зеленскийнинг ушбу баёнотларидан бироз олдин АҚШнинг сайланган президенти Доналд Трамп Украина жанг майдонида 400 минг аскарини йўқотганини ёзган эди. У Россиянинг ҳалок бўлган ва яраланганлар сонини 600 минг кишига баҳолаган.

Эслатиб ўтамиз, Трамп шанба куни Зеленский билан учрашди. Уларнинг Франция президенти Эммануэл Макрон иштирокидаги музокаралари Парижда, қайта тикланган Нотр-Дам ибодатхонасининг очилиш маросимида бўлиб ўтди. Шундай сўнг Трамп Украинада тинчлик музокараларини имкон қадар тезроқ бошлашга чақирганди.