Украина масаласи унинг иштирокисиз муҳокама қилинадими?

Путин Трамп ва Си Цзиньпинга Украинанинг иштирокисиз урушни тугатиш масаласини муҳокама қилишга таклиф қилди — WSJ.

Россия президенти Владимир Путин АҚШ президенти Дональд Трамп ва Хитой раҳбари Си Цзиньпин билан уч томонлама учрашув ўтказиб, Украинага қарши урушни тугатиш шартларини муҳокама қилишни таклиф қилди.

The Wall Street Journal (WSJ) нашри музокаралардан хабардор манбаларга таяниб хабар беришича, Москва ўзи учун қулай шартларда келишувга эришишга умид қилмоқда. Бунда таклиф этилаётган учрашувда Украина томонининг иштироки кўзда тутилмаган.

Нашр маълумотларига кўра, Кремль музокараларни 18–19 ноябрь кунлари Хитойнинг Шэньчжэнь шаҳрида бўлиб ўтадиган Осиё-Тинч океани иқтисодий ҳамкорлиги (АТЭС) саммити доирасида ташкил этишни таклиф қилган.

Россия президенти матбуот котиби Дмитрий Песков бундай учрашув ўтказиш имконияти муҳокама қилинаётганини тасдиқлади.

«Ҳозирча учрашувнинг ўзи ва унинг эҳтимолий кун тартиби бўйича аниқ тушунча йўқ. Бироқ ҳар учала томон ҳам бундай учрашувни ўтказиш имкониятини назарий жиҳатдан тан олмоқда», — деди у.

АҚШ маъмуриятининг юқори мартабали вакили сўзларига кўра, Трамп ҳозирча саммит ўтказишга розилик билдирмаган. Бироқ у мазкур таклифни ижобий қабул қилиши мумкин.

Оқ уй эса Россия томонининг ушбу ташаббуси юзасидан ҳозирча расмий изоҳ бермаган.