UFC Оқ Уйдаги турнирда ноодатий бонусларни тақдим этмоқчи

14 июнга белгиланган Оқ Уйдаги UFC турнири иштирокчилари лиганинг расмий ҳамкорларидан бири – "Crypto" биржаси томонидан криптовалютада тўланадиган умумий қиймати бир миллион долларлик қўшимча бонусларни ютиб олиш имкониятига эга бўлади.

Ушбу сумма жорий йилнинг январь ойидан бошлаб 100 000 долларни ташкил этувчи анъанавий бонусларга қўшимча равишда алоҳида "перформанс" кўрсатган иштирокчилари ўртасида тақсимланади.

Айни пайтда Америка мустақиллигининг 250 йиллигига бағишланган кеча етти жангдан иборат бўлиб, улардан иккитаси титул мақомига эга.

Оқшомнинг марказий тўқнашувида енгил вазнда амалдаги чемпион Илия Топурия ва вақтинчалик чемпион Жастин Гэтжи кураш олиб борса, "Co-main event" жангида Алекс Перрейра ва Сирил Ган оғир вазн тоифасида вақтинчалик чемпионлик камари учун ўзаро октагонга кўтарилади.