Туркияда шартли кириш тартиби бекор қилинди — Бош консулхона

Туркия 2025 йил февралдан бошлаб шартли кириш (şartlı giriş) тартибини бекор қилди. Бу ҳақда Ўзбекистоннинг Истанбулдаги Бош консулхонаси хабар берди.

Бу ўзгариш қонуний қолиш муддатини оширган ёки яшаш гувоҳномаси (ikamet izni) олишда рад жавоби олган барча хорижий фуқароларга тааллуқли.

Энди улар Туркияга дарҳол қайта олмайди. Янгиланган қоидаларга кўра, мамлакатга кириш тақиқи фуқароликка боғлиқ равишда 3 ойдан 6 ойгача бўлиши мумкин.

Норасмий маълумотларга кўра, янги тартиб жорий этилганидан буён 150 дан ортиқ хорижий фуқаро аэропортларда муаммоларга дуч келган.

Бундан келиб чиқиб, Ўзбекистоннинг Истанбулдаги Бош консулхонаси Туркияга сафар қилишни режалаштираётганларнинг ҳужжатларини қайта текширишга ва миграция қоидаларига риоя қилишга чақирди.

Қонуний қолиш муддати тугаган ёки яшаш гувоҳномаси рад этилган ҳолатда мамлакатни қонунга мувофиқ тарк этиш талаб этилади, акс ҳолда кириш тақиқи жорий этилиши мумкин.