Трампнинг "олтин виза" дастурига атиги 338 та ариза келиб тушди

Маълумотларга кўра, миграция ҳуқуқшунослари, жумладан, Мелания Трампнинг собиқ адвокати ҳам мижозларни унда иштирок этмасликка чақирмоқда.

АҚШ президенти маъмурияти апрел ойи охирида Доналд Трамп ташаббуси билан 2025 йил декабрида йўлга қўйилган "олтин виза" дастури бўйича маълумотларни очиқлади. Трамп ушбу лойиҳани бадавлат шахслар учун Қўшма Штатлар фуқаролигини олишнинг тезкор йўли сифатида тарғиб қилган эди ("олтин виза" нархи 1 миллион доллардан бошланади).

Апрел ойи якунига кўра, "олтин виза" олиш учун жами 338 та ариза топширилган. Ушбу аризачилардан фақат 165 нафари 15 минг доллар миқдоридаги қайтариб берилмайдиган рўйхатдан ўтиш божини тўлаган ва атиги 59 киши кейинги босқичга — АҚШ Ички хавфсизлик вазирлигида ҳужжатларни тўлдиришга ўтган.

The Washington Post нашрининг ёзишича, миграция ҳуқуқшунослари ўз мижозларини ушбу дастурда қатнашишдан қайтармоқда. Бунга сабаб сифатида лойиҳа Конгресс томонидан маъқулланмагани ва исталган вақтда президент фармони билан бекор қилиниши мумкинлиги кўрсатиляпти.

Бундан ташқари, дастур суд жараёнлари хавфи остида ва у чет эллик инвесторлар учун мавжуд бошқа миграция дастурларига қараганда ҳеч қандай солиқ имтиёзларини тақдим этмайди.

"Олтин виза" дастури билан ишлашни истамаётган ҳуқуқшунослар орасида Майкл Уайлдс ҳам бор. У ўз вақтида биринчи хоним Мелания Трамп ва унинг ота-онасига АҚШ фуқаролигини олишда ёрдам берган эди.