Трампдан шов-шувли фармон. Ноқонуний муҳожирларга бепул чипта ва “махфий бонус” таклиф этилди

Дональд Трамп ноқонуний муҳожирлар учун “ўз ихтиёри билан чиқиб кетиш” дастури ишга туширилганини эълон қилди.

"АҚШ тарихида илк бор ноқонуний муҳожирлар учун ўз ихтиёри билан мамлакатдан чиқиб кетиш дастурини ишга тушириш ҳақида фармонни имзоладим. Биз ноқонуний муҳожирлар учун Қўшма Штатлардан чиқиб кетишни иложи борича соддалаштиряпмиз. Ҳар қандай ноқонуний муҳожир шунчаки аэропортга бориб, мамлакатимиздан чиқиб кетиш учун бепул чипта олиши мумкин", — деб ёзди Трамп Truth Social ижтимоий тармоғида.

Унинг аниқлик киритишича, бу жараён учун махсус мобил иловалар ишлаб чиқилган бўлиб, улар орқали мигрантлар ватанига қайтиш чипталарини олдиндан банд қилишлари мумкин.

Шунингдек, Трамп мигрантларга “жуда муҳим бонус” ҳам ваъда қилди. Бу бонуснинг миқдори айтилмаган, лекин президент ноқонуний мигрантларнинг чиқиб кетиши АҚШ бюджетига "триллионлаб доллар" тежаш имконини беришини таъкидлади.

"Ноқонуний мигрантлар: бепул чиптангизни ҳозироқ банд қилинг. Биз сизларнинг Америкадан кетишингизни истаймиз", — дея қўшимча қилди АҚШ президенти.

Аввалроқ АҚШ Ички хавфсизлик вазирлиги Қўшма Штатлар ҳудудидан ўз ихтиёри билан чиқиб кетадиган ноқонуний муҳожирларга 1000 доллар тўланишини маълум қилган эди.

Шу билан бирга, Қўшма Штатларни ўз ихтиёри билан тарк этмаган ноқонуний мигрантлар "қатъий оқибатларга" дуч келиши ҳақида огоҳлантирилди, Уларга қамоқ жазоси, жарималар, мол-мулкнинг мусодара қилинуши каби жазолар берилиши мумкин. Шунингдек, улар исталган вақтда ва фақатгина Қўшма Штатларнинг хоҳишига кўра дунёнинг исталган мамлакатига мажбурий депортация қилинишлари мумкинлиги маълум қилинди.