Трамп: "Венесуэла АҚШнинг 53-штати бўлиши мумкин"

АҚШ президенти Дональд Трамп ҳар йили ўтказиладиган Alfalfa клуби кечки овқатида Венесуэла Американинг 53-штатига айланиши мумкинлигини эълон қилди.

Бу ҳақда The Washington Post нашри ушбу тадбирда иштирок этганларга таяниб хабар берди.

The Washington Post маълумотларига кўра, оқшом оммавий ахборот воситалари учун ёпиқ; тахминан 200 иштирокчига иккитадан меҳмон олиб келишга рухсат берилган ва уларнинг барчаси январь ойининг охирги шанбасида Capital Hilton меҳмонхонасида йиғилишди.

Нашрнинг таъкидлашича, Америка раҳбари бу баёнотни "ҳазил тариқасида" айтган.

"Биз Гренландияга бостириб кирмаймиз. Биз уни сотиб оламиз", деди у. "Мен ҳеч қачон Гренландияни 51-штат қилишни ният қилмаганман. Мен Канадани 51-штатга айлантирмоқчиман. Гренландия 52-штат бўлади, Венесуэла эса 53-штат бўлиши мумкин".