Трамп сиёсати АҚШнинг глобал қудратига путур етказмоқда — Foreign Affairs

АҚШнинг собиқ давлат котиби ўринбосари Роберт Зеллик президент Дональд Трампнинг Канада ва Мексикага нисбатан сиёсати мамлакатнинг глобал мавқеига зарар етказаётганини билдирди. Бу ҳақда у Foreign Affairs журналида чоп этилган мақоласида ёзган.

Зелликнинг таъкидлашича, қўшни давлатлар билан дўстона муносабатлар АҚШ миллий хавфсизлигини мустаҳкамлаш, иқтисодий манфаатларни таъминлаш ва трансчегаравий муаммоларни ҳал қилишда муҳим аҳамиятга эга.

Бироқ Трампнинг юқори савдо божлари жорий этиши ва Канадани АҚШнинг 51-штатига айлантириш ҳақидаги баёнотлари икки давлат ўртасидаги муносабатларни кескинлаштирган. Вашингтоннинг Мексикага нисбатан иқтисодий босими ва ҳарбий таҳдидлари ҳам АҚШнинг минтақадаги тарихий устунлиги билан боғлиқ хавотирларни кучайтирган.

Муаллифнинг фикрича, Канада ва Мексика билан яқин ҳамкорлик АҚШга йирик бозорлар, табиий ресурслар, малакали ишчи кучи ва ўзаро интеграциялашган инфратузилмадан фойдаланиш имконини беради. Бу эса Вашингтоннинг Хитой ва Россия каби рақиблар олдидаги геосиёсий устунликларидан биридир.

Зеллик Шимолий Америка эркин савдо битими доирасида эришилган натижаларни эслатиб, уч мамлакат ўртасидаги ҳамкорликнинг заифлашиши узоқ муддатли иқтисодий ва стратегик оқибатларга олиб келиши мумкинлигидан огоҳлантирди.

Унинг таъкидлашича, АҚШ глобал мавқеини сақлаб қолиш учун қўшнилари билан муносабатларни босим ва қарама-қаршилик эмас, балки ўзаро ҳурмат, иқтисодий шериклик ва хавфсизлик соҳасидаги ҳамкорлик асосида ривожлантириши лозим.