Дональд Трампнинг шахсий ёрдамчиси Мадлен Вестерхоут журналистлар билан мулоқотда оғзига эрк бергани учун ишидан айрилди. Бу ҳақда "togri.uz" ёзмоқда.
Президент Трамп август ойи бошларида гольф клубида эканлигида, унинг шахсий ёрдамчиси Мадлен Вестерхоут журналистлар билан норасмий тамадди қилиш чоғида бир қатор ортиқча гапларни айтиб қўйган.
Қарийб бир соат давом этган тамадди вақтида Вестерхоут Трамп билан муносабатларини жуда яхши баҳолаган. Ҳатто президентнинг ўз қизлари Иванка ва Тиффанидан ҳам кўра кўпроқ у билан яқинлигини айтган. Айни суҳбат чоғида, Трампнинг "семизроқ" деб таърифлаган қизи Тиффани билан бирга суратга тушишни ёқтирмаслигини қўшимча қилган.
Айтган гаплари ОАВда тарқалиши ортидан Вестерхоут Оқ уйдаги ишини йўқотди. Дональд Трамп президентлик лавозимига киришганидан бери шахсий ёрдамчиси бўлиб ишлаб келган Вестерхоутга келгуси ишларида омад тилаган.