Трамп нима учун Жанубий Африкадаги G20 саммитидан чиқишини эълон қилди?

АҚШ президенти Доналд Трамп 22–23 ноябр кунлари Жанубий Африкада ўтказилиши режалаштирилган G20 саммитидан чиқишини эълон қилди.

Майамида бўлиб ўтган Америка бизнес форумида сўзга чиққан Трамп Йоханнесбургдаги саммитда иштирок этмаслигини тасдиқлади.

“Жанубий Африка G20 гуруҳига кирмаслиги керак”, — деди Америка етакчиси.

Трамп Жанубий Африкада “қатор воқеалар” бўлаётганини ва уларни “ҳеч қачон маъқулламаганини” таъкидлади, аммо қайси воқеаларни назарда тутганини аниқ айтмади.

Эслатиб ўтамиз, шу йил май ойида Трамп Оқ уйда Жанубий Африка президенти Кирил Рамафосани қабул қилган эди. Ушбу учрашувда АҚШ раҳбари Жанубий Африка ҳукуматини мамлакатдаги оқ танли аҳолига қарши содир этилаётган жиноятларнинг олдини олмаётганликда айблаган.

Президент Рамафоса эса бунга жавобан, ҳукумат мамлакатдаги юқори даражадаги жиноятчиликни назорат қилиш учун чоралар кўраётганини, “фақат оқ танлилар жиноят қурбони бўлмоқда” деган даъволарни эса қатъий рад этганини маълум қилган.