Трамп Лос-Анжелес ёки Сан-Диегони йўқ қилинишига розидек

АҚШ президенти Дональд Трамп Эрон билан уруш юзага келган тақдирда, мамлакат Америка шаҳарларидан бирини, жумладан Лос-Анжелес ёки Сан-Диегони йўқ қилиши мумкинлигини айтди. Унинг бу баёноти Калифорния раҳбарияти ва Демократик партия вакилларининг кескин муносабатига сабаб бўлди.

Трамп Небраскада тарафдорлари билан учрашувда сўзлар экан, урушнинг иқтисодий оқибатлари, хусусан, ёқилғи, ўғит ва бошқа маҳсулотлар нархининг ошиши ҳақида гапирди. Унинг таъкидлашича, АҚШ хавфсизлигини таъминлаш учун бундай иқтисодий харажатларни қабул қилишга тўғри келиши мумкин.

«Яна бир бор эслатиб ўтаман: уруш сабабли буларнинг барчаси сунъий равишда юзага келмоқда, нархлар бироз ошган. Бу тўлаш керак бўлган кичик нарх. Тинчлик ва мамлакатимиз хавфсизлигини таъминлаш учун бу жуда кичик нарх. Улар бирор шаҳарни йўқ қилиши мумкин. Лос-Анжелесни йўқ қилишсин, Сан-Диегони йўқ қилишсин. Бу жуда кичик нарх ва буларнинг барчаси тез орада якунланади», — деди Трамп.

Калифорния губернатори Гэвин Ньюсом Трампнинг баёнотига кескин муносабат билдириб, унинг сўзларини «хавфли» деб атади. Лос-Анжелес мэри Карен Басс эса бундай баёнотлар шаҳар хавфсизлигига таҳдидлар ҳақидаги хавотирларни кучайтириши мумкинлигини таъкидлади.

Сан-Диего ҳудудидан сайланган демократик конгрессмен Сара Жейкобс эса унинг сайловчилари, жумладан ҳарбий хизматчилар, фахрийлар ва уларнинг оилалари «қабул қилинадиган йўқотишлар» сифатида кўрилмаслиги кераклигини билдирди.

Оқ уй вакиллари эса Трампнинг сўзлари нотўғри талқин қилинганини маълум қилди. Уларнинг тушунтиришича, президент Эрон томонидан АҚШ ҳудудига эҳтимолий ядровий зарба берилишининг олдини олиш зарурлигини назарда тутган.