Трамп ЖАРни оқ танли аҳолига қарши геноцидда айблади

21 май куни Оқ уйнинг Овал кабинетида АҚШ президенти Доналд Трамп ва Жанубий Африка Республикаси президенти Сирил Рамафоса ўртасида учрашуви бўлиб ўтди. Учрашувда дўстона бошланган суҳбат ЖАРдаги оқ танли ер эгаларининг аҳволи ҳақидаги қизғин муҳокамага айланиб кетди.

Учрашув давомида Трамп Жанубий Африкани "оқ танли фермерларга қарши геноцид"да айблаб, буни тасдиқлаган фотосуратлар ва видеоларни кўрсатган.

"Одамлар ўз ҳаётларидан қўрқиб Жанубий Африкадан қочмоқда. Уларнинг ерлари тортиб олинмоқда, кўп ҳолларда ўлдирилмоқда", — дея таъкидлади Трамп.

Жанубий Африка ҳукумати бу даъволарни қайта-қайта рад этиб, мамлакатдаги жиноятчиликнинг юқори даражаси бутун аҳолига таъсир қилишини ва қурбонларнинг катта қисми Трамп таъкидлаганидек оқ танлилар эмас, қора танлилар эканлигини билдирди.

Euronews'нинг ёзишича, учрашув Жанубий Африкада ирқчилик тизимининг иқтисодий меросини ҳал қилиш мақсадида айрим ҳолларда компенсациясиз ерларни давлат ихтиёрига тортиб олишга рухсат берувчи мунозарали қонунни қабул қилганидан кейин АҚШ ва ЖАР ўртасидаги зиддиятлар кучайган пайтга тўғри келди.

Трамп бу сиёсатни кескин танқид қилиб, уни "оқ танлиларга қарши дискриминация" шакли деб атаган. У Жанубий Африкадаги оқ танлилар, айниқса, фермерлар зўравонлик ва изолясияга учраганини бир неча бор таъкидлаган. Трамп Қўшма Штатларнинг ЖАРга бир қатор ёрдам дастурларини молиялаштирини тўхтатган. Шу билан бирга, Претория ҳукумати ерларни мусодара қилаётганига тўхталган ва жорий сиёсат давом этса, ноябр ойида Йоханнесбургда бўлиб ўтадиган G20 саммитини бойкот қилиш билан таҳдид қилган.

Ўз навбатида, Жанубий Африка расмийлари Трамп маъмуриятини мамлакатдаги оқ танли озчиликнинг “ҳикоясидан” Преториянинг Халқаро Жиноий судидаги Исроилнинг Ғазо секторидаги ҳуқуқбузарликларига доир позициясини бузиш учун фойдаланганишда айбламоқда.