Трамп: Ғазодаги маҳбуслар 13 октябрда озод этилиши мумкин

Ғазо секторидаги маҳбуслар 13 октябрда озодликка чиқарилиши мумкин, деди АҚШ президенти Дональд Трамп Fox News телеканалига берган интервьюсида. У бу ҳақда Фаластиннинг ҲАМАС ҳаракати ва Исроил ўртасида Ғазода о‘t очишни тўхтатишнинг биринчи босқичи бўйича эришилган келишувларни шарҳлар экан маълум қилди.

“Бу фақат Ғазо эмас. Бу — Яқин Шарқда тинчлик сари ташланган қадам,” — деди Америка раҳбари.

Трамп маҳбусларни озод қилиш муҳим аҳамиятга эга эканини таъкидлади:

“Маҳбусларнинг озод этилиши жуда муҳим воқеа. Улар 13 октябрда озодликка чиқиши мумкин.”

АҚШ президенти Исроил бош вазири Биньямин Нетаньяху билан яқинда бўлиб ўтган суҳбатни ҳам эслаб ўтди ва келишув натижаларидан ҳайратда эканини билдирди:

“Мен Нетаньяхуга Исроил дунёга қарши тура олмаслигини айтдим. У буни тушунади,” — деди Трамп.

“Тинчлик кенгаши”

Трамп от очишни тўхтатиш режасини амалга ошириш истиқболлари ҳақида гапирар экан, шундай деди:

“Биз одамларнинг ҳамжиҳатликда яшашини кўрамиз ва Ғазо қайта тикланади. Бу муаммоларни ҳал қилиш учун ‘Тинчлик кенгаши’ деб аталган ташкилот тузилди. Аҳоли ҳимоя қилинади, минтақани бутунлай янги воқелик кутмоқда.”

Президентнинг сўзларига кўра, Ғазо “сезиларли даражада хавфсизроқ” ҳудудга айланади ва бошқа давлатлар уни қайта тиклашда ёрдам беради.

Аввалроқ Дональд Трамп Исроил ва ҲАМАСнинг Ғазо бўйича от очишни тўхтатиш режасининг биринчи босқичини маъқуллаганини маълум қилган эди. Бу режа барча маҳбусларни озод қилиш ва Исроил қўшинларини олдиндан келишилган чизиққа олиб чиқишни ўз ичига олади.

ҲАМАС ҳам от очишни тўхтатиш келишувини расман тасдиқлади.

Ғазо бўйича келишув эълон қилинганидан олдин Трамп бу ҳудудга ташриф буюришга тайёрлигини айтган эди:

“Ҳа, мен буни кўриб чиқяпман. Ҳали якуний қарор қабул қилинмаган, лекин Ғазога боришим мумкин,” — деди у Оқ уйда журналистларга.

Саёҳат олдидан маҳбуслар озод этилишини кутаяпсизми, деган саволга Трамп шундай жавоб берди:

“Мен Яқин Шарққа маҳбуслар озод этилганидан олдин ёки кўп ўтмай бораман. Биз Яқин Шарққа тинчлик олиб келамиз.”