Дональд Трамп яқин соатларда Эрон ҳудудига қарши янги кенг кўламли ҳужумлар амалга оширилишини маълум қилди. Унинг сўзларига кўра, янги зарбалар 10 ва 11 июнь кунлари давом этади.
Трамп бу қарорни Уммон соҳиллари яқинида АҚШнинг AH-64 Apache вертолёти уриб туширилганига жавоб сифатида изоҳлади.
“Биз кеча уларга қаттиқ зарба бердик. Бугун ҳам уларга қаттиқ зарба берамиз. Менимча, бунга ҳаққимиз бор. Улар ақл бовар қилмас даражадаги техникани уриб туширишди”, — деди Трамп журналистлар билан мулоқот чоғида.
Шу билан бирга, АҚШ президенти Вашингтон ва Эрон ўртасидаги тинчлик келишуви амалда тўлиқ келишиб олинганини таъкидлади.
“Улар фақат ҳужжатни имзолашлари керак. Биз ишлайдиган келишувни хоҳлаймиз. Нима бўлишини кўрамиз. Биз келишувга жуда яқинмиз”, — деди Трамп.
Эслатиб ўтамиз, 8 июнь оқшомида Уммон соҳиллари яқинида Apache вертолёти ҳалокатга учраган эди. Ҳодисада икки учувчи қутқариб қолинган. АҚШ томони воқеада Эронни айблаган.
10 июнь куни АҚШ кучлари вертолёт ҳалокатига жавоб сифатида Эрондаги нишонларга зарбалар берганини маълум қилди. Шундан сўнг Ислом инқилоби муҳофизлари корпуси Баҳрайн, Қувайт ва Иорданиядаги АҚШ ҳарбий объектларига зарбалар берилганини эълон қилди.
Шу тариқа, АҚШ ва Эрон ўртасидаги ҳарбий қарама-қаршилик янги босқичга ўтаётгани ҳақидаги хавотирлар кучаймоқда, бир вақтнинг ўзида Трамп дипломатик келишув ҳали ҳам мумкинлигини таъкидламоқда.
Миллион россиялик мамлакатни тарк этди
47°C иссиқликда тонг ҳам, тун ҳам йўқ: Ҳиндистоннинг энг иссиқ ҳудудида бир кун
Ўзбекистон – Нидерландия ўртоқлик ўйини Нью-Йоркда бўлиб ўтади
