Трамп Эронга ишонмаслигини билдирди

АҚШ президенти Теҳронни музокаралар жараёнида Америка томонига бир неча бор ёлғон гапиришда айблади.

АҚШ президенти Дональд Трамп музокаралар масаласида Эронга ишонмаслигини билдириб, Теҳрон Америка томонига бир неча бор ёлғон маълумот берганини таъкидлади.

Трамп бу баёнотни Огайо штатидаги тадбирдан Вашингтонга қайтиш йўлида журналистларнинг саволларига жавоб бераётганида билдирди.

«Мен Эронга ишонмайман. Нега мен Эронга ишонаман, дегандек гапиряпсиз? Мен Эронга энг кам ишонаман. Улар менга доимо ёлғон гапиришган», — деди АҚШ президенти.

Трамп, шунингдек, АҚШ Ҳурмуз бўғози устидан тўлиқ назорат ўрнатганини билдирди.

«Ҳозир Ҳурмуз бўғози устидан тўлиқ назорат бизда. Назорат уларда эмас, тўлиқ назорат бизда. У бизники», — деди Трамп.

АҚШ президенти ўтган ойда НАТО саммити якунланганидан сўнг Туркиядан учиб кетиш вақтида АҚШ Махфий хизмати хавфсизлик нуқтаи назаридан унга бошқа самолётдан фойдаланишни тавсия қилганини ҳам тасдиқлади.

Трампнинг айтишича, у Махфий хизмат ва ҳарбийлар тавсиясига амал қилган ва эҳтимолий таҳдиднинг аниқ хусусиятларини билишга уринмаган.

«Менимча, қандайдир таҳдид бўлган. Мен бу ҳақда кўп суриштирмадим. Менга жуда кўп таҳдидлар келиб туради», — деди у.