Трамп Эрон билан келишувни рад этди ва нефть нархи ошди

АҚШ президенти Теҳрон билан рамкавий келишувни узайтиришдан бош тортишини маълум қилганидан сўнг нефть нархи 2 фоиздан кўпроққа қимматлади. Ҳормуз бўғози атрофидаги кескинлик ҳам яна кучайди.

АҚШ президенти Дональд Трамп Эрон билан музокаралар муддати якунига яқинлашаётган рамкавий келишувни узайтириш нияти йўқлигини билдирганидан сўнг нефть нархлари кескин кўтарилди. Бу вазиятда можаронинг янада авж олиши ва Ҳурмуз бўғози орқали кемалар қатнови билан боғлиқ хавотирлар кучайди.

Brent нефти нархи 2,4 фоизга ошиб, бир баррели 90,60 долларга етди. Америка нефти WTI эса 2,2 фоизга қимматлаб, 84,20 доллар бўлди.

Трамп Эрон АҚШ билан келишув тузишни исташини, аммо Вашингтон зарур деб ҳисоблаётган шартларни қабул қилишга тайёр эмаслигини айтди. «Улар келишув тузишни хоҳлайди, аммо мен зарур деб ҳисоблаётган келишувни тузишни истамаяпти», — деди АҚШ президенти.

Трампнинг сўзларига кўра, Вашингтоннинг асосий мақсади Эроннинг ядровий қуролга эга бўлишига йўл қўймасликдан иборат. «Биз бу ерда битта сабаб билан турибмиз: Эрон ядровий қуролга эга бўла олмайди. Унда ядровий қурол бўлмайди ҳам», — деди Трамп.

АҚШ президенти, шунингдек, июнь ойида Покистон воситачилигида эришилган рамкавий келишувни узайтиришга умид қилмаётганини билдирди. Бу келишув доирасидаги 60 кунлик музокаралар муддати кенг қамровли келишувсиз якунланиш арафасида.

Трамп дипломатик саъй-ҳаракатларда Уммоннинг роли ва Ҳормуз бўғозини очиш масаласи ҳақида ҳам гапирди. Масқатга нисбатан сабри тугаган-тугамаганлиги ҳақидаги саволга АҚШ президенти Уммон «ўзини унчалик яхши тутмагани»ни айтди ва Вашингтон вазиятни «жуда осонлик билан» ҳал қила олишини қўшимча қилди.

Душанба куни эртароқ нефть нархи пасайган эди: инвесторлар геосиёсий хавфларни Форс кўрфази давлатларидан бўғоз орқали нефть етказиб бериш давом этаётгани билан таққослаган. Бу ҳозирча хомашёнинг дарҳол тақчиллашиши хавфини пасайтирмоқда.