Трамп Эрон билан эҳтимолий келишув ҳақида гапирди

Теҳрон эса тинчлик музокаралари ҳақидаги хабарларни кичиклаштириб, АҚШ талабларини реал эмас деб атади.

АҚШ президенти Дональд Трамп Вашингтон ва Теҳрон ўртасида урушни тўхтатиш бўйича келишув «жуда мумкин» эканини яна бир бор маълум қилди. Унинг сўзларига кўра, сўнгги бир сутка ичида музокаралар «жуда яхши» ўтган ва томонлар келишувга эришиши мумкин.

Оқ уйда журналистлар олдида сўзлаган Трамп битимга эришиш «жуда эҳтимолий» эканини айтди. Шу билан бирга, у келишув бўлмаган тақдирда ҳарбий ҳаракатлар қайта бошланиши мумкинлигидан огоҳлантирди.

Бироқ Теҳронда эҳтимолий тараққиёт ҳақидаги хабарларга эҳтиёткорона муносабат билдирилди. Эрон парламентининг миллий хавфсизлик бўйича комиссияси вакили Эброҳим Резоий АҚШнинг урушни тўхтатиш ҳақидаги таклифини фақат «Америка хоҳишлари рўйхати» деб атаб, у «реалликни акс эттирмаслигини» билдирди. Эрон давлат ОАВ хабарларига кўра, мамлакат ҳукумати ҳозирча Покистон орқали етказилган тинчлик режасини ўрганмоқда.

Эрон президенти Масъуд Пезешкиён Франция президенти Эммануэль Макрон билан суҳбатда АҚШ ҳаракатлари «дипломатия йўлини таҳдид, босим ва санкциялар томон буриб юборганини» айтди. Унинг таъкидлашича, Теҳрон Вашингтон билан икки марта мулоқотга киришган ва ҳар икки ҳолатда ҳам музокаралар ҳарбий зарбалар билан кузатилган.

Шу билан бирга, The Washington Post нашри сунъий йўлдош тасвирлари таҳлилига таяниб хабар беришича, уруш давомида Эрон зарбалари Яқин Шарқдаги АҚШга тегишли камида 228 та объект ва техникани шикастлаган ёки йўқ қилган. Улар орасида ангарлар, казармалар, ёнилғи омборлари ҳамда алоқа ва ҳаво ҳужумидан мудофаа тизимлари элементлари бор. АҚШ Марказий қўмондонлиги бу маълумотларга изоҳ беришдан бош тортган.