Трамп АҚШ Польшага қўшимча 5000 аскар юборишини маълум қилди

АҚШ президенти Дональд Трамп Америка Польшага қўшимча 5000 нафар ҳарбий юборишини билдирди.

Бу қарор Пентагон аввал режалаштирилган 4000 нафар аскарни жойлаштиришни бекор қилганидан бир ҳафта ўтиб эълон қилинди.

НАТО бош котиби Марк Рютте мазкур қадамни олқишлаб, Европа келажакда АҚШга камроқ қарам бўлиш йўлидан давом этишини айтди.

Трамп Truth Social ижтимоий тармоғидаги саҳифасида бу қарор АҚШ қўллаб-қувватлаган Польша президенти Кароль Навроцкий билан муносабатлар билан боғлиқлигини ёзди.

Бироқ Америка раҳбари бу аввалдан режалаштирилган жойлаштириш эканини ёки янги операция бошланаётганини аниқлаштирмади.

Польша президенти Кароль Навроцкий эса Трампга миннатдорлик билдириб, икки давлат ўртасидаги муносабатлар ҳамкорлик, ўзаро ҳурмат ва умумий хавфсизликка таянишини таъкидлади.

“Мен АҚШ президенти Дональд Трампга Польша билан дўстлиги ва бугун амалий аҳамиятини кўриб турган қарорлари учун миннатдорлик билдираман”, — деди у.

Марк Рютте саммит арафасида НАТО кучлироқ Европа ва кучлироқ альянс сари ҳаракат қилаётганини, бунда вақт ўтиши билан АҚШга бўлган қарамлик камайишини қайд этди.