Трамп АҚШ нефть гигантларини танқид қилди

АҚШ президенти Дональд Трамп мамлакатнинг энг йирик нефть компанияларини жаҳон бозорида нефть нархлари ошгани ортидан ортиқча фойда олаётганликда танқид қилди. Унинг фикрича, Chevron ва ExxonMobil ёқилғи нархларини истеъмолчилар учун пасайтириши керак.

«Улар жуда кўп пул ишлаяпти. Бу менга ёқмайди. Chevron — жуда кўп пул ишлаяпти. Exxon Mobil ҳам жуда-жуда кўп пул ишлаяпти», — деди Трамп Оқ уйдаги Овал кабинетда журналистлар билан суҳбатда.

Президентнинг таъкидлашича, Эрон атрофидаги вазият барқарорлашгач, нефть нархлари кескин тушиши кутилмоқда. Унинг айтишича, нефть компаниялари тақчилликдан фойда олиш ўрнига, ёқилғи чакана нархларини ҳозирнинг ўзида пасайтириши лозим.

Бундан аввал АҚШнинг йирик нефть компаниялари Эрон билан боғлиқ уруш ва Ҳурмуз бўғози орқали нефть етказиб беришдаги узилишлар фонида фойдаси кескин ошганини маълум қилган эди. Молиявий ҳисоботлар эълон қилингач, Трамп Chevron бош директори Майк Виртни ҳам танқид қилиб, компания «истеъмолчилар учун нархларни дарҳол тушириши керак», дея баёнот берган.

Шу билан бирга, АҚШ Конгрессидаги демократлар йирик нефть компанияларининг ортиқча даромадига қўшимча солиқ жорий этиш ва тушумни истеъмолчиларни қўллаб-қувватлашга йўналтиришни таклиф қилди. Нефть ишлаб чиқарувчилар эса бу ташаббусга қарши чиқиб, бундай чоралар инвестициялар қисқаришига олиб келиши мумкинлигини таъкидламоқда.