Колбаса куйдирги келтириб чиқариши ёлғон, деб хабар қилмоқда Ўзбекистон Соғлиқни сақлаш вазирлиги.
Хабарда айтилишига кўра, ижтимоий тармоқларда тарқалган, гўёки Тошкентда колбасада куйдирги касаллиги юқиши мумкинлиги ҳақидаги хабарлар – ҳеч нарсага асосланмаган ёлғон хабар.
Эслатиб ўтамиз, сўнгги кунларда ижтимоий тармоқларда Тошкентда қассобчилик билан шуғулланган фуқаро куйдирги касаллигидан вафот этгани ва ушбу касаллик билан зарарланган гўшт колбаса ишлаб чиқариш цехларига тарқатилгани ва шу боис колбаса ва сосиска маҳсулотларини истеъмол қилмаслик лозимлиги ҳақидаги аудио мурожаат тарқалган эди.
Санитария эпидемиологик осойишталик агентлиги директори Баҳром Алматовнинг қайд этишича, куйдирги касаллигини ташқи муҳитда (тупроқда) ўта чидамли бўлган бактерия қўзғатади. Ушбу касаллик, асосан, терида очиқ яралари бўлган инсон томонидан касалланган чорва молларини сўйиш жараёнида юқиши мумкин. Касаллик одамларда асосан терида яра шаклида, ҳайвонларда эса септик шаклда учрайди. Мазкур касаллик ҳайвонлардан одамларга юқади, касал одамдан соғлом одамга юқмайди.