Бокс бўйича собиқ жаҳон чемпионлари, америкалик Майк Тайсон ва Флойд Мейвезер Конго Демократик Республикасида кўргазмали жанг ўтказадилар.
Бу ҳақда Тайсон ўзининг «X» (собиқ Twitter) ижтимоий тармоғидаги саҳифасида маълум қилди.
Ушбу тадбир 2026 йилнинг 25 апрель куни бўлиб ўтиши режалаштирилган. Таъкидлаш жоизки, жанг жойи сифатида Конгонинг танланиши рамзий маънога эга — айнан шу ерда 1974 йилда Муҳаммад Али ва Жорж Форман ўртасидаги афсонавий «Чангалзордаги тўқнашув» («Rumble in the Jungle») бўлиб ўтган эди.
48 ёшли Мейвезер ўзининг профессионал боксдаги фаолияти давомида 50 та ғалабага (шундан 27 таси нокаут билан) эришган ва бирор марта мағлуб бўлмаган. У бешта вазн тоифасида жаҳон чемпиони бўлган ва 1996 йилги Олимпия ўйинларининг бронза медали совриндоридир. Мейвезер профессионал фаолиятини 2017 йилда якунлаган эди.
Профессионал фаолиятини тугатгандан сўнг Мейвезер бир нечта кўргазмали жанглар ўтказди. У кикбоксчи Тенсин Нацукавани биринчи раундда нокаутга учратди, блогерлар Логан Пол ва Дон Мур билан жанглари дуранг билан якунланди, ММА жангчиси, япониялик Микуру Асакура ва блогер Оладежи Олатунжини мағлуб этди, Аарон Чалмерс ва Жон Готти билан учрашувлари эса натижасиз деб топилди. Бундан ташқари, у икки вазн тоифасида UFC камарининг собиқ соҳиби, ирландиялик Конор Макгрегорни бокс қоидалари бўйича кечган баҳсда мағлуб этган.
59 ёшли Майк Тайсон эса сўнгги бор 2024 йилнинг ноябрь ойида блогер Жейк Полга қарши рингга чиқиб, ҳакамлар қарорига кўра имкониятни бой берган эди.
Имомали Раҳмон вафот этди(ми)?
Ер юзидаги совуқлик рекорди қайд этилди
Мадурони қўлга олиш операцияси ҳақида янги маълумот пайдо бўлди
