Сурхондарёда 10-мактабнинг 10-синф ўқувчиси ўз отасини пичоқлаб ўлдирди

Мактаб ўқувчиси отасининг танбеҳларидан жаҳли чиқиб, уни қасддан ўлдириш мақсадида танасининг турли жойларига пичоқ билан зарба берган.

“Jahon.uz” нинг ишончли манбаси тақдим қилган суд ҳукмида келтирилича, Сурхондарё вилояти Денов туман судининг очиқ суд мажлиси биносида вояга етмаган И.Б.Б. ва унинг қонуний вакили Р.Ж.Ж ҳамда жабланувчининг қонуний вакили иштирокида, судланувчи вояга етмаган Б.Б.И ўғлига оид 1-1905-1901/24-сонли жиноят ишини кўрди.

Б.Б.И ўғли 2002 йил 2 февраль куни Денов туманида туғилган, миллати ўзбек, Ўзбекистон Республикаси фуқароси, Денов туманидаги 10-сонли умумий ўрта таълим мактабининг 10-синф ўқувчиси, буйдоқ, муқаддам судланмаган, Денов туман “янги обод” маҳалласида яшаган, эҳтиёт чораси сифатида қамоқда сақланмоқда.

Иш ҳужжатларига кўра вояга етмаган Б.Б.И ўғли 2018 йил 14 октябрь куни соат 19:00 ларда, Денов туман “Намуна” маҳалласи ҳудудида жойлашган яшаш уйида, марҳум отаси Б.И.Ннинг танбеҳларидан жаҳли чиқиб, уни ўлдириш мақсадида, ҳожатхонага яшириб қўйган пичоқни олиб, марҳум Н.Б.Ини кўкрак, қорин ва сон қисмларига зарб билан уриши оқибатида, Н.Б.И касалхонага олиб борилаётган вақтда вафот этган.

Суд-психиатрия эксперитизасининг 2018 йил 4 декабрь кунидаги хулосасига кўра, вояга етмаган Б.Б.И ўғли “Болалар типидаги шизофрения кўринишидаги сурункали руҳий касаллик” билан касалланганлиги, ижтимоий хавфли қилмишни содир этаётган вақтда ўз ҳаракатларининг моҳиятини тушуна олмаганлиги ҳамда ўзини бошқара олмаганлиги сабабли Тошкент Республика кузатуви кучайтирилган руҳий касалликлар шифохонасига кузатув остида мажбурий даволанишга муҳтож эканлиги қайд этилган.

Ўзбекистон Республикаси Жиноят кодексининг 92-моддасида, ижтимоий хавфли қилмишни ақли норасолик ҳолатида ёки ҳукм чиқарилгунга қадар ёхуд жазони ўташ вақтида руҳий касалликка чалинганлиги оқибатида ўз ҳаракатларининг аҳамиятини англамаслик ва ўз ҳаракатларини бошқара олмаслик ҳолатида содир этган шахсга нисбатан, агар у руҳий ҳолати ва содир этган қилмишининг хусусиятига кўра жамият учун хавфли деб топилса, суд тиббий йўсиндаги мажбурлов чоралари тайинлаши мумкинлиги, шунингдек ЖК 94-моддасининг 4-қисмида кузатув кучайтирилган руҳий касалликлар шифохонасида ёки бўлимда мажбурий даволаш ўта ижтимоий хавфли бўлган ёки ўз хулқига кўра умумий тартибли руҳий касалликлар шифохонаси шароитида даволанишининг имкони бўлмаган руҳий касалларга нисбатан тайинланиши мумкинлиги қайд этилган.

Суд ҳайъати, вояга етмаган Б.Б.И ўғли ижтимоий хавфли қилмишни ақли норасо ҳолатда содир этган деб ҳисоблаб, тиббий йўсиндаги мажбурлов чораси тайинлашни, жиноят ишини тугатишни ҳамда Б.Б.И ўғли Тошкент Республика кузатуви кучайтирилган руҳий касалликлар шифохонасига жойлаштиргандан сўнг унга нисбатан қўлланилган қамоққа олиш тарзидаги эҳтиёт чорасини бекор қилишни, вояга етмаган Б.Б.И ўғлини Тошкент Республика кузатуви кучайтирилган руҳий касалликлар шифохонасига жойлаштиришни, Термиз шаҳар УЯ 64/8-сонли ва Тошкент шаҳар УЯ 64/1-сонли тергов хибсхоналари бошлиқлари зиммасига юклашни, ажрим нусхасини ижро қилиш учун Термиз шаҳар УЯ 64/8-сонли ва Тошкент шаҳар УЯ 64/1-сонли тергов хибсхоналари ҳамда Тошкент Республика кузатуви кучайтирилган руҳий касалликлар шифохонасига юборишни лозим топди.

Вояга етмаган Б.Б.И ўғли Ўзбекистон Республикаси Жиноят кодекси 97-моддасининг 1-қисмида назарда тутилган ижтимоий хавфли килмишни ақли норасо ҳолатда содир этган деб топилди.

Вояга етмаган Б.Б.И ўғлига нисбатан тиббий йўсиндаги мажбурлов чораси қўлланилсин ва у Тошкент Республика кузатуви кучайтирилган руҳий касалликлар шифохонасига жойлаштирилиши белгиланди.

Вояга етмаган Б.Б.И ўғлининг қилмишида жиноят таркиби бўлмаганлиги сабабли жиноят иши тугатилди.

Вояга етмаган Б.Б.И ўғли Тошкент Республика кузатуви кучайтирилган руҳий касалликлар шифохонасига жойлаштирилгандан сўнг унга нисбатан қўлланилган қамоққа олиш тарзидаги эҳтиёт чораси бекор қилиниши айтилди.