Сурияда ёқилғи нархининг кескин ошиши ортидан намойишлар бошланди

Якшанба куни (13 сентябрь) Суриянинг бир қатор вилоятларида ҳукуматнинг ёқилғи нархини ошириш тўғрисидаги қарорига қарши норозилик намойишлари бўлиб ўтди, деб хабар бермоқда РБК. Намойишга Ҳалаб вилояти шимолидаги Мареа ва Эл-Баб шаҳарлари аҳолиси чиқди. Фуқаролар йўлни тўсиб, у ерда ўт қўйишган. Раққада хавфсизлик кучлари ёниб кетган шиналарни ўчиришга мажбур бўлди. Бундан ташқари, намойишчилар Идлиб вилояти жанубидаги Мааррат-ан-Нуман туманида М5 автомобиль йўлини тўсиб қўйди. Сурияда бир кечада дизель ёқилғиси нархи 40 фоизга, бензин нархи эса тахминан 26–28 фоизга кескин қимматлашгани ортидан оммавий норозиликлар келиб чиққан. Намойишчилар Ҳалаб-Дамашқ автомагистралини тўсиб қўйган. Минтақа ОАВларининг қайд этишича, ёқилғи нархи ошишидан келиб чиққан норозилик қисқа фурсат ичида кенг кўламли тартибсизликларга айланиб бормоқда.