Сурия илк бор G7 саммитида иштирок этади

Президент Аҳмад аш-Шара Францияда бўлиб ўтадиган «Катта еттилик» саммитида Дамашқ номидан қатнашади.

Сурия 15–17 июнь кунлари Франциянинг жануби-шарқидаги Эвиан-ле-Бен шаҳрида бўлиб ўтадиган G7 саммитида меҳмон сифатида иштирок этиш учун таклиф олди.

Мамлакатни тадбирда Аҳмад аш-Шара вакиллик қилади. Бу Дамашқнинг 1975 йилда форум ташкил этилганидан бери унинг йиғилишларидаги илк иштироки бўлади.

Кутилмоқдаки, музокаралар давомида Сурия томони мамлакатнинг таъминот занжирлари учун эҳтимолий стратегик хаб сифатидаги ролини муҳокама қилишга асосий эътибор қаратади.

Бу масала Ҳурмуз бўғози ёпилганидан кейин янада долзарб аҳамият касб этди. Хабарга кўра, февраль ойи охирида Эронда уруш бошланганидан сўнг мазкур стратегик бўғоз орқали кемалар ҳаракати деярли тўлиқ тўхтаган ва бу жаҳон иқтисодиётига жиддий таъсир кўрсатган.

Ҳозирда Сурия йиллар давом этган можаролар ва санкциялар оқибатида издан чиққан иқтисодиётни тиклашга интилмоқда. Гарчи Асадлар оиласи даврида жорий этилган чекловларнинг катта қисми юмшатилган бўлса-да, хорижий инвестицияларни жалб қилиш ва халқаро банк алоқаларини тиклаш жараёни расмийлар кутганидан кўра секинроқ кечмоқда.